‘पेन्सन पट्टा’को पहिलो गीतमा दयाहाङदेखि विल्सनसम्म

नमस्ते चितवन

शुक्रबार, साउन ०१, २०८३ मा प्रकाशित

काठमाडौं । अभिनेता तथा निर्देशक माओत्से गुरुङ निर्देशित नेपाली चलचित्र ‘पेन्सन पट्टा’को पहिलो गीत ‘जुनी जाला’ सार्वजनिक गरिएको छ। आगामी भदौ २६ गतेदेखि प्रदर्शनमा आउने चलचित्रको प्रचार अभियानअन्तर्गत निर्माण टिमले साउन १ को अवसर पारेर गीत सार्वजनिक गरेको हो।

सार्वजनिक गीतमा दयाहाङ राई, बुद्धि तामाङ, विल्सन विक्रम राई, गौमाया गुरुङ र माओत्से गुरुङको जीवन्त अभिनय देख्न सकिन्छ। गुरुङ समुदायको मौलिक संस्कृति, परम्परा, भेषभूषा र ग्रामीण जीवनशैलीलाई आकर्षक ढंगले प्रस्तुत गरिएको गीतले चलचित्रको कथावस्तुबारे पनि संकेत गर्छ।

गीतमा हर्क साउदको शब्द, मनोज थापा मगरको संगीत तथा सरुन गुरुङ, राजबहादुर गुरुङ, उषा गुरुङ र प्रिया गुरुङको स्वर रहेको छ। कमलबहादुर गुरुङको कोरियोग्राफी रहेको गीतमा गितारमा सञ्जीव बराइली, मादलमा पोषण मगर, बाँसुरीमा रत्न विश्वकर्मा र सारङ्गीमा मनीष गन्धर्वको प्रस्तुति रहेको छ।

निर्देशक माओत्से गुरुङका अनुसार चलचित्रले ग्रामीण परिवेश, पारिवारिक सम्बन्ध, प्रेम, त्याग, आशा र संघर्षको कथा प्रस्तुत गर्छ। जीवनका कठिन मोडहरू पार गर्दै लक्ष्य हासिल गर्ने यात्रालाई चलचित्रले भावनात्मक रूपमा चित्रण गर्ने उनको भनाइ छ।

माओत्से गुरुङ फिल्म्सको ब्यानरमा निर्माण भएको चलचित्रमा पुष्कर गुरुङ, पाशुपति राई, स्वर्गीय सुनिल थापा, सोल गुरुङ, मनोज गुरुङ, अनुशा राई र लुनिभा तुलाधरलगायत कलाकारको अभिनय रहेको छ।

चलचित्रको कथा तथा निर्देशन माओत्से गुरुङकै हो। सुशन प्रजापतिको छायांकन, नेमिश श्रेष्ठ र केर डी. कोइच लिनुचको सम्पादन, राजेन्द्र मोक्तानको कलर ग्रेडिङ, उत्तम न्यौपानेको साउन्ड डिजाइन, नवीन श्रेष्ठको सिन्क साउन्ड, मनोज श्रेष्ठको भिजुअल इफेक्ट्स (VFX) तथा राजु याक्चाको कला निर्देशन रहेको छ।

चलचित्रका निर्माता मिन कोन्मे गुरुङ (यूके), भोजबहादुर गुरुङ (यूके), माया गुरुङ (हङकङ) र सपना गुरुङ हुन्। डी.बी. गुरुङ प्रोडक्सन म्यानेजर रहेका छन् भने चलचित्रको वितरण आरआर फिल्म्सले गर्नेछ।

निर्माण पक्षका अनुसार चलचित्रको अन्तर्राष्ट्रिय प्रदर्शन अधिकार हङकङ, अष्ट्रेलिया, न्युजिल्यान्ड र बेलायतमा बिक्री भइसकेको छ। अन्य देशमा पनि प्रदर्शनका लागि छलफल भइरहेको जनाइएको छ।

हरितालिका तीजको अवसर पारेर भदौ २६ गते प्रदर्शनमा आउन लागेको ‘पेन्सन पट्टा’ले नेपाली ग्रामीण जीवन र मानवीय संवेदनाको कथा दर्शकमाझ नयाँ शैलीमा प्रस्तुत गर्ने निर्माण पक्षको विश्वास छ।