‘चमेलीको पोइ’ले ल्यायो टिकटक च्यालेन्ज, उत्कृष्ट चारलाई नगद पुरस्कार

नमस्ते चितवन

बुधबार, साउन ०६, २०८३ मा प्रकाशित

काठमाडौं । निर्देशक एभरेष्ट सूर्य बोहरा निर्देशित नयाँ नेपाली चलचित्र ‘चमेलीको पोइ’को शीर्ष गीत ‘ओइ ओइ चमेली, तिम्रा शेरे खोइ…’ सार्वजनिक भएसँगै निर्माण पक्षले टिकटक डान्स तथा कन्टेन्ट क्रिएसन प्रतियोगिता घोषणा गरेको छ।

निर्माण टिमका अनुसार TikTok, Facebook, Instagram Reels तथा YouTube Shortsमा उक्त गीतमा आधारित भिडियो बनाएर प्रतियोगितामा सहभागी हुन सकिनेछ। सहभागीले भिडियो पोस्ट गर्दा #Chamelikopoi, #Ashoj16CKP र #OioiChameli ह्यासट्याग अनिवार्य रूपमा प्रयोग गर्नुपर्नेछ।

प्रतियोगिताका उत्कृष्ट चार विजेतालाई नगद पुरस्कार प्रदान गरिनेछ। प्रथम हुनेले ५० हजार रुपैयाँ, द्वितीयले ३० हजार रुपैयाँ, तृतीयले १५ हजार रुपैयाँ र चौथो हुनेले ५ हजार रुपैयाँ प्राप्त गर्नेछन्। विजेता भिडियोको मौलिकता, प्रस्तुति र सिर्जनात्मकताको आधारमा छनोट गरिने निर्माण पक्षले जनाएको छ।

सार्वजनिक गीतमा राजनराज शिवाकोटी र इन्दिरा जोशीको स्वर रहेको छ। गीतका शब्द निर्देशक एभरेष्ट सूर्य बोहराले लेखेका हुन् भने संगीत पनि राजनराज शिवाकोटीकै रहेको छ। कबिराज गहतराजको कोरियोग्राफी रहेको गीतमा नारायण त्रिपाठी, सुरक्षा पन्त र विल्सन विक्रम राई फिचर्ड छन्।

पोस्टर सार्वजनिक भएदेखि नै चर्चामा रहेको यस चलचित्रमार्फत करिब डेढ दशकपछि चर्चित हास्य अभिनेता नारायण त्रिपाठी (प्रेमचरो) नेपाली चलचित्रमा पुनरागमन गर्दैछन्।

चलचित्रमा मुकुन भुसाल, सुरक्षा पन्त, विल्सन विक्रम राई, उमेश राई, रवीन्द्र झा, गणेश गौतम, प्रेमदेव गिरी, अंशु महर्जन, बविन राई, खड्गबहादुर पुन, रजनी गुरुङ, मिना आरएल शाही, रितु मल्ल ठकुरी, तारा शर्मा, सुनीता सापकोटा, विशाल पाण्डे, श्रेया नारायण, धनलक्ष्मी बोहरा र अनुष्का नारायणलगायत कलाकारहरूको अभिनय रहेको छ।

धनलक्ष्मी सिने मेकर्सको प्रस्तुतिमा निर्माण भएको चलचित्रको छायांकन शेरबहादुर तामाङले गरेका हुन्। निर्माता सुनीता सापकोटा र रामनारायण उपाध्याय हुन् भने उदय विक्रम राणा, रितु मल्ल कुँवर, सुमित्रा थापा र कपिल आचार्य कार्यकारी निर्माताका रूपमा रहेका छन्।

चलचित्रका सहनिर्मातामा नारायण त्रिपाठी, यमप्रसाद ओली, सुदीप कुँवर र प्रदीपकुमार सापकोटा रहेका छन्। धनलक्ष्मी श्रेष्ठ बोहरा लाइन प्रोड्युसर रहेको चलचित्रमा कुमार महर्जनको द्वन्द्व निर्देशन, बन्दे प्रसादको सम्पादन रहेको छ भने आरआर फिल्म्सले देशव्यापी वितरण गर्नेछ।

चलचित्र असोज १६ गतेदेखि देशभर प्रदर्शनमा आउने तयारीमा छ।