‘बेहुली’को पहिलो गीतले तोड्यो रेकर्ड, ४८ घण्टामै टिकटकमा ५० हजार भिडियो

नमस्ते चितवन

आइतबार, साउन १०, २०८३ मा प्रकाशित

काठमाडौं । आगामी भदौ २६ गतेदेखि प्रदर्शनमा आउन लागेको बहुप्रतीक्षित नेपाली चलचित्र ‘बेहुली’ को पहिलो गीत ‘दिलमा ठाउँ छ’ ले डिजिटल प्लेटफर्ममा धमाकेदार सफलता हासिल गरेको छ। सार्वजनिक भएको ४८ घण्टा नबित्दै गीत टिकटक र युट्युब दुवैमा भाइरल बन्दै नयाँ कीर्तिमानतर्फ अग्रसर भएको हो।

गीत सार्वजनिक भएको दुई दिनभित्रै टिकटकमा ५० हजारभन्दा बढी भिडियो निर्माण भएका छन्, जुन नेपाली चलचित्रका गीतका लागि निकै दुर्लभ उपलब्धि मानिएको छ। त्यस्तै, ओएसआर डिजिटलको युट्युब च्यानलमा सार्वजनिक गरिएको भिडियोले ६ लाखभन्दा बढी भ्यूज पार गरिसकेको छ भने यसको लोकप्रियता अझै तीव्र गतिमा बढिरहेको छ।

लोक स्वादमा तयार पारिएको यो गीत अहिले सबै उमेर समूहका दर्शक र स्रोतामाझ लोकप्रिय बनेको छ। सर्वसाधारणदेखि चर्चित कलाकारसम्मले टिकटकमा यसको हुक–स्टेपमा भिडियो बनाइरहेका छन्। पोस्टर र पहिलो गीतकै सफलताले चलचित्रप्रति दर्शकको उत्सुकता निकै बढाएको छ।

प्रस्तुतकर्ता अर्जुन पोखरेलको शब्द तथा संगीत रहेको गीतमा अञ्जु पन्त, प्रशान्त सिवाकोटी र रवि ओडको स्वर रहेको छ। भिडियोमा पारस बम ठकुरी (कुल ब्वाइ), दिव्या रायमाझी, सुशान्त कार्की र पदम तामाङको आकर्षक नृत्य देख्न सकिन्छ। सियोन श्रेष्ठको कोरियोग्राफी रहेको भिडियोमा पारस र दिव्या बेहुला–बेहुलीको भेषमा प्रस्तुत भएका छन् भने सुशान्त र पदमको विशेष उपस्थितिले थप आकर्षण थपेको छ।

@osrdigitalnp

Dilma Thau Chha || BEHULI – बेहुली Nepali Movie Song 2026 / 2083 || Anju Panta, Prashant Siwakoti, Ravi Oad || Arjun Pokharel || Cool Boy (Paras Bam Thakuri), Divya Rayamajhi, Sushant Karki, Padam Tamang || Behuli Movie Song “Dilma Thau Chha” 2026 BEHULI – बेहुली In Cinemas: Bhadra 26, September 11

♬ original sound – OSRDigital – OSRDigital

सशान कँडेलको निर्देशन तथा माधव शर्माको लेखन रहेको चलचित्रमा पारस, दिव्या, सुशान्त र पदमसँगै सन्तोष बानियाँ, सरिता गिरी, विशाल पहारी, कर्मा लामा, दीपक गौली, विमल यादव, अविरल श्रेष्ठ, सविन कट्टेल र समायरा थापा मगरलगायत कलाकारको अभिनय रहेको छ।

द डिभाइन म्युजिक र सम्मान इन्टरटेन्मेन्टको संयुक्त प्रस्तुति रहेको चलचित्रका निर्माता प्रताप शमशेर राणा, कार्यकारी निर्माता शङ्कर कोइराला र रमेश सिलवाल, तथा सह–निर्माता दुर्गा खरेल र शिशिर श्रेष्ठ हुन्। चलचित्रको छायांकन नरेन्द्र मैनाली, सम्पादन विकास दाहाल र एक्सन कोरियोग्राफी रोशन श्रेष्ठले गरेका छन्। काठमाडौं उपत्यकाभित्र काफिया फिल्म्स र उपत्यका बाहिर श्री व्यंकटेश इन्टरटेन्मेन्टले वितरण गर्ने चलचित्रको डिजिटल अधिकार ओएसआर डिजिटलसँग रहेको छ।