हास्य कलाकार जोगिन्दरको ‘बालेन सरकार’ सार्वजनिक, समसामयिक राजनीतिमाथि व्यंग्य

नमस्ते चितवन

आइतबार, साउन २४, २०८३ मा प्रकाशित

काठमाडौं । लोकप्रिय हास्य कलाकार शिवशंकर रिजाल ‘जोगिन्दर’ले यस वर्षको गाईजात्राका लागि नयाँ हास्यव्यंग्यात्मक कोसेली ‘बालेन सरकार’ सार्वजनिक गरेका छन्। उनले समसामयिक राजनीतिक घटनाक्रम, सरकारको कार्यशैलीदेखि विभिन्न राजनीतिक दल र नेताहरूमाथि व्यंग्य गर्दै ‘बालेन सरकार’ ल्याएका हुन्।

रिजालले आफ्नो गाईजात्रे प्रस्तुतिमार्फत पछिल्लो राजनीतिक अवस्था र समाजमा देखिएका समसामयिक विषयलाई हास्यव्यंग्यको शैलीमा प्रस्तुत गरेका छन्। साथै, उनले गत फागुन २१ गते सम्पन्न निर्वाचनलाई समेत व्यंग्यको विषय बनाएका छन्।

आफ्नो प्रस्तुति ‘बालेन सरकार’मार्फत सरकारलाई सुझाव र खबरदारीसमेत गरिएको कलाकार रिजालले बताएका छन्। उनका अनुसार गाईजात्रे व्यंग्य मनोरञ्जनसँगै समाज र राजनीतिक विकृतिमाथि प्रश्न उठाउने माध्यम पनि हो।

‘बालेन सरकार’ ओएसआर डिजिटलको युट्युब च्यानलमार्फत सार्वजनिक गरिएको छ। विगत २३ वर्षदेखि नियमित रूपमा गाईजात्राका लागि हास्यव्यंग्यात्मक कोसेली प्रस्तुत गर्दै आएका रिजालले यसपटक पनि समसामयिक विषयलाई केन्द्रमा राखेका छन्।

यसै प्रस्तुतिमा उनले लोकप्रिय लोकदोहोरी गीत ‘आमाले सोध्लिन् नि’ माथि प्यारोडीसमेत तयार पारेका छन्। लोकगायक राजु परियारको स्वर रहेको उक्त गीतको प्यारोडीमा लोकराज अधिकारीको शब्द तथा अष्ट लामाको संगीत संयोजन रहेको छ। प्यारोडीमार्फत कांग्रेस, एमाले, माओवादी केन्द्रलगायत विभिन्न राजनीतिक दल तथा नेताहरूमाथि व्यंग्य गरिएको छ।

प्यारोडीको कोरियोग्राफी समन अधिकारीले गरेका छन् भने सम्पादन प्रेम शर्माको र छायांकन हरि ढकालको रहेको छ। पोस्ट प्रोडक्सनको काम कोचे मिडियाले गरेको हो।

‘बालेन सरकार’ रिजालको २३औँ गाईजात्रे कोसेली हो। यसअघि उनले गत वर्ष ‘मिस चौरासी’ प्रस्तुत गरेका थिए, जसले दर्शकबाट राम्रो प्रतिक्रिया पाएको थियो।

रिजालले विसं २०६१ सालदेखि हरेक वर्ष गाईजात्राका अवसरमा नियमित रूपमा हास्यव्यंग्य कार्यक्रम प्रस्तुत गर्दै आएका छन्। उनी गाईजात्रालाई हास्यकलाकारका लागि आफ्नो सिर्जना र प्रस्तुतिमार्फत समाजका विकृति तथा समसामयिक विषयमाथि व्यंग्य गर्ने महत्वपूर्ण अवसरका रूपमा लिन्छन्।