समितिका संयोजक पौडेलका अनुसार अहिले १५ दिनमा एक पटक बृहत् रूपमा सरसफाइ गरिँदै आइएको छ। अस्पताल परिसरमा एउटा बाल उद्यानसहित ६ वटा साना उद्यानहरू छन्। दुबो लगाइएका ती उद्यानहरूमा हरियाली हुने बिरुवाहरू रहेका छन्। तिनीहरूको सरसफाइ, गोडमेल र छाँटकाँट जस्ता काम गरिँदै आइएको छ। यसका अतिरिक्त अस्पताल परिसरमा बिरुवाहरू लगाउने, छाँटकाँट, गोडमेल र भौतिक पूर्वाधारहरूमा रङ्गरोगन जस्ता कामहरू भइरहेका छन्।

यससँगै बिरामी र आफन्तहरू कुन भवनमा जाने हो, त्यहाँ पुग्न सहज बनाउने काम भइरहेको छ। रङ्गहरूमार्फत सहजै जान चाहेको ठाउँमा पुग्ने गरी अस्पतालले व्यवस्थापन गर्दैछ। समितिका संयोजक पौडेलका अनुसार अस्पतालका कर्मचारीहरूबाट सेवाग्राहीसँगको व्यवहारमा सुन्दरता ल्याउने गरी काम भइरहेको छ।

बिरामी र आफन्तहरूलाई अस्पतालभित्रका सूचना सहज बनाउने काम पनि गरिएको छ। शौचालयसहित अन्य ठाउँहरूमा सरसफाइको नियमित अनुगमनको काम पनि थालिएको छ। उनले भने, ‘कम खर्चमा फरकपना दिलाउने गरी हामी काममा लागेका छौँ।’ अस्पताल प्रशासनले अगाडि रहेको पुरानो भवन भत्काएर त्यहाँ पानीका फोहोरा, ढुङ्गेधारा र बगैँचा बनाउने तयारी गरेको छ। कोही अस्पताल आउँदा जति नै तनाव लिएर आए पनि यहाँ छिरिसकेपछि वातावरणीय रूपमा शान्त बनाउने गरी काम भइरहेको छ।

बिरामीको उपचारसँगै उनीहरूले पाउने सम्मान, स्वच्छ वातावरण र सहज सेवा पनि अस्पतालको गुणस्तरको महत्त्वपूर्ण पक्ष भएकाले भरतपुर अस्पतालले सुरु गरेको यो अभियानले सेवा संस्कृतिमा सकारात्मक परिवर्तन ल्याउने अपेक्षा गरिएको छ। यस अस्पतालमा विभिन्न जिल्लाबाट बिरामी उपचारका लागि आउने गर्छन्। एकै दिनमा तीन हजार ८०० जनासम्मले बहिरङ्ग सेवाबाट उपचार लिएको तथ्याङ्क छ।