चितवन । नेपाली चलचित्र ‘पार्वती’को प्रचारप्रसारका लागि चितवनमा पत्रकार भेटघाट कार्यक्रम आयोजना गरिएको छ। कार्यक्रममा निर्माण पक्षले चलचित्रको कथावस्तु, कलाकार र प्रदर्शन तयारीबारे सञ्चारकर्मीलाई जानकारी गराएको हो।
अभिनेत्री नीता ढुङ्गानाको लेखन तथा निर्देशन रहेको ‘पार्वती’ भदौ १२ गते शुक्रबारदेखि देशभर प्रदर्शनमा आउँदैछ। चलचित्रमा अटिजम भएकी दिदी र उनका भाइबीचको माया, आत्मीयता र संघर्षलाई मुख्य कथाका रूपमा प्रस्तुत गरिएको छ।
चलचित्रमा नीता ढुङ्गाना स्वयं मुख्य भूमिकामा छिन् भने बाल कलाकार तथा गायक अशोक दर्जीले उनका भाइको भूमिका निर्वाह गरेका छन्। दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारको पनि अभिनय रहेको छ।
निर्मात्रीसमेत रहेकी ढुङ्गानाका अनुसार ‘पार्वती’को कथा अटिजम भएका व्यक्तिको जीवन, भावना र व्यवहारबारे गहिरो अनुसन्धानपछि तयार गरिएको हो। अटिजम भएकी दिदीको दैनिक जीवन, उनको भावना र भाइसँगको सम्बन्धमा विकसित हुने माया तथा पारिवारिक संघर्षलाई चलचित्रले संवेदनशील ढंगले प्रस्तुत गरेको निर्माण पक्षले जनाएको छ।
ढुङ्गानाले ‘पार्वती’को कथालाई अन्य चलचित्रसँग तुलना गर्न नहुने बताउँदै यसको विषयवस्तु र कथा आफ्नै किसिमको रहेको स्पष्ट पारेकी छन्।
फरक विषयवस्तु र भावनात्मक प्रस्तुतिका कारण चलचित्रप्रति दर्शकको चासो बढेको निर्माण पक्षको भनाइ छ। चलचित्रले परिवार र सम्बन्धको महत्वसँगै अटिजम भएका व्यक्तिलाई बुझ्ने दृष्टिकोणबारे पनि सन्देश दिने अपेक्षा गरिएको छ।
‘पार्वती’ले चलचित्र केन्द्रीय जाँच समितिबाट ‘युनिभर्सल’ सर्टिफिकेट प्राप्त गरेको छ। यससँगै परिवारका सबै सदस्यले एकसाथ बसेर चलचित्र हेर्न सक्ने निर्माण पक्षले जनाएको छ।
चितवनको पत्रकार भेटघाटमार्फत निर्माण पक्षले दर्शकलाई चलचित्रलाई माया र साथ दिन आग्रह गर्दै भदौ १२ गतेदेखि नजिकैको सिनेमा हलमा पुगेर ‘पार्वती’ हेर्न अनुरोध गरेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.