नीति शाह र प्रभात पालको रोमान्टिक जोडी, ‘जदौ’को ‘तिमीसँग नबोली’ सार्वजनिक

नमस्ते चितवन

आइतबार, भदौ २१, २०८३ मा प्रकाशित

काठमाडौं, २१ भदौ । आगामी असोज ९ गतेदेखि प्रदर्शनमा आउन लागेको प्रतिक्षित फिल्म ‘जदौ’को दोस्रो गीत सार्वजनिक गरिएको छ। फिल्ममा समावेश ‘तिमीसँग नबोली’ बोलको प्रेम गीत आइतबार हाइटेक इन्टरटेन्मेन्टको युट्युब च्यानलमार्फत सार्वजनिक गरिएको हो।

सार्वजनिक गीतको भिडियोमा नायिका नीति शाह र नायक प्रभात पाल ठकुरीलाई रोमान्टिक भावमा प्रस्तुत गरिएको छ। किरण गजमेर र मनिषा सुनारको स्वर रहेको गीतमा गोपाल लोहारको शब्द तथा अर्जुन पोखरेलको संगीत छ। गीतको भिडियोमा रामजी लामिछानेको कोरियोग्राफी रहेको छ।

अन्जन शर्मा र काजी लिम्बूको संयुक्त निर्देशनमा बनेको ‘जदौ’मा अन्तरजातीय प्रेम सम्बन्धको विषयलाई कथाको केन्द्रमा राखिएको छ। फिल्मको स्क्रिप्ट निर्देशक काजी लिम्बूले लेखेका हुन्।

टिजर सार्वजनिक भएसँगै दर्शकमाझ कौतूहलता बढाएको फिल्ममा नीति शाह र प्रभात पाल ठकुरीसँगै मुकुन भुसाल, ऋचा शर्मा, राजश्री थापा, विनोद न्यौपाने, नरेश पौड्याल, गीता अधिकारी, खड्कबहादुर पुन (खबपु), सुन्दर धिताल, सन्ध्या श्रेष्ठ र सुमित्रा देवकोटालगायतका कलाकारको अभिनय छ।

यसअघि फिल्मको शीर्ष गीत ‘जदौ हजुर’ सार्वजनिक गरिएको थियो। उक्त गीतले दर्शक तथा स्रोताको राम्रो प्रतिक्रिया पाइरहेका बेला निर्माण पक्षले दोस्रो गीत सार्वजनिक गरेको हो। आकर्षक लोकेसनमा छायांकन गरिएको ‘तिमीसँग नबोली’ले पनि दर्शकको मन जित्ने अपेक्षा निर्माण पक्षको छ।

श्याम तामाङ र नवराज उप्रेतीको छायांकन रहेको फिल्ममा राजाराम सुवेदी, सुमित्रा देवकोटा, दीपक पोखरेल, नारायण शास्त्री र डिल्ली पोखरेल सह–निर्माता छन्। सृजना शर्मा र मनिष शर्मा निर्माता तथा शान्ति पुडासैनी कार्यकारी निर्माता हुन्। फिल्मको प्रोडक्सन हेड बिमला भण्डारी रहेकी छन्।

समीश्रण मुभीज एण्ड इन्टरटेन्मेन्टले सिल्भर स्क्रिन इन्टरटेन्मेन्ट प्रालिसँगको सहकार्यमा निर्माण गरेको ‘जदौ’को देशव्यापी वितरण एनजिसिएन ग्रुपले गर्नेछ। फिल्म असोज ९ गतेदेखि देशभर प्रदर्शनमा आउनेछ।