प्रेम, सम्बन्ध र मतभेदको कथा बोकेको ‘माया बस्छ कि के हो !’को ट्रेलर रिलिज

नमस्ते चितवन

सोमबार, भदौ २२, २०८३ मा प्रकाशित

काठमाडौं ,२२ भदौ – लभस्टोरी चलचित्र ‘माया बस्छ कि के हो !’को ट्रेलर सार्वजनिक गरिएको छ। साइराम पिक्चर्सको युट्युब च्यानलमार्फत सार्वजनिक गरिएको करिब तीन मिनेट लामो ट्रेलरमा डेब्यु अभिनेता सोनाल लामा र कस्मता निरौलालाई प्रमुख भूमिकामा प्रस्तुत गरिएको छ।

असोज २ गतेदेखि प्रदर्शनमा आउने चलचित्रलाई राजु अधिकारीले निर्देशन गरेका हुन्। ट्रेलरमा युरोपका सुन्दर शहरसँगै नेपाली गाउँको परिवेशलाई पनि समेटिएको छ। अध्ययन तथा रोजगारीका लागि विदेश पुगेका युवा–युवतीबीचको प्रेम, सम्बन्धमा आउने उतारचढाव तथा मतभेदलाई चलचित्रको कथाको मुख्य आधार बनाइएको देखिन्छ।

चलचित्रका अधिकांश दृश्य बेल्जियम, स्वीजरल्याण्ड, नेदरल्याण्डलगायत युरोपेली मुलुकमा छायांकन गरिएको निर्माण पक्षले जनाएको छ। ट्रेलरमा विदेशको परिवेशमा हुर्किएको प्रेमसँगै नेपाली समाज र पारिवारिक भावनाको झल्कोसमेत देखाइएको छ।

शरद अधिकारी निर्माता रहेको चलचित्रका निर्माता बहादुर सिंह तामाङ हुन्। आरती अधिकारीको कथा तथा मौनता श्रेष्ठको पटकथा र संवाद रहेको चलचित्रलाई रामप्रसाद चौधरीले सम्पादन गरेका छन्।

जनपुकार मिडिया हाउसको ब्यानरमा निर्माण भएको चलचित्रको छायांकन रविन्द्र बरालले गरेका हुन्। चलचित्रका गीतमा अर्जुन पोखरेलको संगीत तथा कमल राई र रामजी लामिछानेको कोरियोग्राफी रहेको छ।

‘माया बस्छ कि के हो !’मा सोनाल लामा र कस्मता निरौलासँगै नरेन्द्र थापा, उपेन्द्र थापा, बेनी ढुंगाना, सब्बु पौडेल, तारा शर्मा, हरिकृष्ण कार्की, तेजेन्द्र कँडेल, रिचा थापा, खिन्नबहादुर भण्डारी (भोला), जेपी पाण्डे, रामजी राउत, करुणा थापा, बिकुलाल बासु र सुकचन्द्र थापालगायत कलाकारको अभिनय छ।

चलचित्रलाई नेशनल सिने ग्रुपले वितरण गर्नेछ। ‘माया बस्छ कि के हो !’ असोज २ गतेदेखि देशभर प्रदर्शनमा आउने तयारीमा छ।