‘पार्वती’को नयाँ गीत ‘भगवान सबैको होइन र’ सार्वजनिक

नमस्ते चितवन

सोमबार, भदौ २२, २०८३ मा प्रकाशित

काठमाडौं । हलमा प्रदर्शनरत नेपाली चलचित्र ‘पार्वती’मा समावेश नयाँ गीत ‘भगवान सबैको होइन र’ सार्वजनिक गरिएको छ। चलचित्र दोस्रो हप्तामा प्रवेश गरेसँगै निर्माण टिमले प्रचारप्रसारलाई निरन्तरता दिँदै नयाँ गीत दर्शकमाझ ल्याएको हो।

मार्मिक भाव बोकेको गीतको भिडियोमा चलचित्रकी मुख्य अभिनेत्री नीता ढुङ्गानालाई प्रस्तुत गरिएको छ। गीतका शब्दले समानता, पीडा र भावनात्मक प्रश्नलाई उठाएको छ। ‘भगवान सबैको होइन र’ र ‘म अरूजस्तै होइन’जस्ता भावले गीतलाई थप मार्मिक बनाएका छन्।

गीतमा ममता गुरुङको स्वर रहेको छ भने प्रशान्त सिवाकोटीले संगीत दिएका छन्। युवराज काफ्लेको शब्द रहेको गीतमा चलचित्रको कथासँग मेल खाने भावनालाई शब्दमार्फत प्रस्तुत गरिएको छ।

नीता ढुङ्गानाको निर्देशनमा बनेको चलचित्रको कथा पनि उनकै हो। शिवम् अधिकारीले पटकथा लेखेका छन्। चलचित्रमा नीता ढुङ्गानासँगै अशोक दर्जी, दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेल र दिप्त प्रकाश अधिकारीलगायत कलाकारको अभिनय छ।

चलचित्रका प्रोडक्सन म्यानेजर तथा कार्यकारी निर्माता शंकर पाण्डे हुन् भने हरिहर अधिकारी निर्माता छन्।

गत भदौ १० गते रसुवाको भोटेकोशी क्षेत्रमा आएको बाढीपहिरोका कारण उत्पन्न विपद्को समयमा समेत दर्शकले चलचित्रलाई साथ दिइरहेको निर्माण पक्षले जनाएको छ।

यसअघि चलचित्रका दुई गीत सार्वजनिक भइसकेका छन्। अशोक दर्जी र बाबुल गिरीको स्वरमा ‘मेरी दिदी’ तथा रचना रिमाल, सरु गौतम र सहिमा श्रेष्ठको स्वरमा ‘नौतुना रेल’ सार्वजनिक गरिएको थियो। दुवै गीतलाई दर्शक–श्रोताबाट राम्रो प्रतिक्रिया प्राप्त भएको निर्माण पक्षको दाबी छ।

नयाँ गीत ‘भगवान सबैको होइन र’ले पनि दर्शकको मन जित्नेमा निर्माण टिम विश्वस्त देखिएको छ।