चार भाषामा आयो ‘प्रतिवैरम्’को ‘माहोल गरम’, प्रियंका कार्कीको आइटम अवतार

नमस्ते चितवन

आइतबार, असोज ११, २०८३ मा प्रकाशित

काठमाडौं । रोशन दासको निर्देशनमा निर्माण भएको चलचित्र ‘प्रतिवैरम्’को आइटम गीत ‘माहोल गरम’ चार भाषामा सार्वजनिक गरिएको छ। निर्माण पक्षले चलचित्रको प्रचारलाई तीव्रता दिने उद्देश्यले गीतलाई नेपाली, हिन्दी, मैथिली र भोजपुरी भाषामा सार्वजनिक गरेको हो।

नेपाली संस्करण ओएसआर डिजिटलबाट सार्वजनिक गरिएको छ भने हिन्दी, मैथिली र भोजपुरी संस्करण आदर्श प्रोडक्सनबाट रिलिज गरिएको छ। नेपाली संस्करणमा रोशन दासको शब्द र मनीष अधिकारीको संगीत रहेको छ। हृतिका श्रेष्ठको स्वर रहेको गीतमा अभिनेत्री प्रियंका कार्कीलाई ‘बसन्ती’को भूमिकामा प्रस्तुत गरिएको छ।

हिन्दी संस्करण ‘जवानी कातिल’, मैथिली संस्करण ‘जवानी सेहो कातिल’ र भोजपुरी संस्करण ‘गाउँवा बा घायल’ शीर्षकमा सार्वजनिक भएका छन्। हिन्दीमा शिवानी भगतको स्वर तथा लभ कर्णको शब्द रहेको छ। मैथिली र भोजपुरी संस्करणमा सुमन मण्डलको शब्द तथा समीक्षा चौधरीको स्वर रहेको छ।

गीतमा प्रियंका कार्कीसँगै नवीन श्रेष्ठ, रोनी यादव, नारायण बिक र प्रदीप ढकाल देखिएका छन्। मनोरञ्जनात्मक प्रस्तुतिसँगै गीतमा चलचित्रका केही एक्सन दृश्यसमेत समेटिएको छ। गीतको अन्त्यतिर अभिनेता सम्राट दासलाई एक्सन अवतारमा प्रस्तुत गरिएको छ। ‘प्रतिवैरम्’ सम्राटको डेब्यु चलचित्रसमेत हो।

नितेश घतान र हरि ढकालले छायांकन गरेको गीतलाई सुरेन्द्र बसेलले कोरियोग्राफी गरेका छन्। कबिर ओड र पंकज महतोको सम्पादन तथा समीर मियाँको भीएफएक्स रहेको छ।

चलचित्रमा सम्राट दास, बिरेन्द्र सिंह कुशवाहा, आलिशा बास्तोला, सुप्रज्ञा शर्मा, नारायण बिक, आशिष डिके र रमेश बुढाथोकीलगायत कलाकारको अभिनय रहेको छ।

रोशन दासको कथा तथा निर्देशन रहेको चलचित्रको पटकथा, संवाद तथा लेखनमा युवराज भट्टराई जोडिएका छन्। हर्ष कुमार यादव र सत्यराज चौलागाईं निर्माता रहेको चलचित्रका कार्यकारी निर्माता बिक्की शाह, क्रिएटिभ निर्माता राकेश शाह, सह–निर्माता अनिश पोखरेल तथा एसोसिएट प्रोड्युसर रजन देवी र रीता देवी रहेका छन्।

रेज इन्टरटेन्टमेन्टको प्रस्तुति रहेको ‘प्रतिवैरम्’ आदर्श प्रोडक्सन, सिम्पल एड मिडिया र श्रीयान इन्टरटेन्टमेन्टको सहकार्यमा निर्माण भएको हो। चलचित्र मंसिर ४ गतेदेखि देशभर प्रदर्शनमा आउने तयारीमा छ। यसको वितरण नेसनल सिनेमा ग्रुपले गर्नेछ।

मधेशको सामाजिक परिवेश, एक्सन, सम्बन्ध, अपराध र बदलाको कथामा आधारित चलचित्र नेपालीसँगै हिन्दी, मैथिली र भोजपुरी भाषामा समेत प्रदर्शन हुने निर्माण पक्षले जनाएको छ।