दशैँको माहोल झल्काउने ‘परिवार’को ‘रातो टिका’ सार्वजनिक

नमस्ते चितवन

शनिबार, असोज १७, २०८३ मा प्रकाशित

काठमाडौं । आगामी कात्तिक १३ गतेदेखि प्रदर्शनमा आउने तयारीमा रहेको चलचित्र ‘परिवार’को दशैँ विशेष गीत ‘रातो टिका’ सार्वजनिक गरिएको छ।

दशैँमा टीका लगाएपछि परिवार र आफन्तबीच हुने रमाइलो माहोललाई केन्द्रमा राखिएको गीतमा बाबुल गिरीको स्वर, शब्द र संगीत रहेको छ। उनलाई गायिका बबी लिम्बुले स्वरमा साथ दिएकी छन्। स्वरांकन स्टुडियोमा रेकर्ड गरिएको गीतको एरेन्ज, मिक्सिङ तथा मास्टरिङ पनि बाबुल गिरीले नै गरेका हुन्।

डान्सिङ शैलीको गीतको भिडियोमा चलचित्रका मुख्य कलाकार कामेश्वर चौरासिया, लक्ष्मी बर्देवा, लक्ष्मीनाथ तिमिल्सिना, विनिता बस्नेतलगायत देखिएका छन्। भिडियोमा प्रयोग गरिएका लिङ्गे पिङ, सजाइएका घर र सफा आँगनले गाउँघरको दशैँको वातावरण झल्काउँछ।

‘रातो टिका’ म्युजिक नेपालको आधिकारिक युट्युब च्यानलमार्फत सार्वजनिक गरिएको हो। यसअघि चलचित्रको फस्टलुक र टिजर सार्वजनिक भइसकेका छन्। ती सामग्रीले दर्शकबाट राम्रो प्रतिक्रिया पाइरहेको भन्दै निर्माण पक्षले नयाँ गीतले पनि दर्शकको मन जित्ने अपेक्षा गरेको छ।

‘कहिले श्रीमानको वार, कहिले श्रीमतीको वार, मिल्दै जाँदा बन्यो परिवार’ भन्ने नारासहित निर्माण भएको चलचित्रलाई मदन थापाले निर्देशन गरेका हुन्।

रे अफ आर्ट प्रालिको ब्यानरमा निर्माण भएको चलचित्रमा प्रेम थापा र गणेश उपाध्यायको लेखन, निरज कँडेलको डीओपी, विशेष महर्जन र जयन्द्र कुँवरको छायांकन तथा एनबी महर्जनको एक्सन निर्देशन रहेको छ।

फिल्ममा कामेश्वर चौरासिया, लक्ष्मी बर्देवा, विनिता बस्नेत, लुनिभा तुलाधर, लक्ष्मीनाथ तिमिल्सिना, बारिश सोना र प्रियान्शु थापालगायत कलाकारको अभिनय छ।

रमेश शाही निर्माता रहेको चलचित्रमा कैलाश रावल कार्यकारी निर्माता र आरम्भ रिजाल सह–निर्माता छन्। शाही फिल्म प्रोडक्सन र विशआई फिल्मस्सँगको सहकार्यमा निर्माण भएको ‘परिवार’ कात्तिक १३ गतेबाट प्रदर्शनमा आउनेछ।