पाल्पाको निस्दीमा २७ जना असल बुहारी सम्मानित

नमस्ते चितवन

मङ्गलबार, असार ०७, २०७९ मा प्रकाशित

असार ७ ,पाल्पा । पाल्पाको निस्दी गाउँपालिकाले असल बुहारीलाई सम्मान गरेको छ । गाउँपालिकाले वडा नं.४ , मित्यालका २७ जना असल बुहारीलाई सम्मान गरेको हो ।पछिल्लो समय ग्रामीण बस्तीमा युवापुस्ता नबस्ने समस्या रहेको समयमा यहाँ बुहारीले परिवारको जेष्ठ नागरिक तथा सासु, सासुरालाई राम्रोसँग हेरचाह गरेको भन्दै उनीहरुलाई सम्मान गरेको निस्दी गाउँपालिकाका वडा नं. ४ का अध्यक्ष सन्तवीर सुनारीले बताउनुभयो ।

सम्मानित असल बुहारीहरुलाई कपडा र सम्मानपत्रले सम्मान गरिएको थियो । सम्मान कार्यक्रममा निस्दी गाउँपालिकाका प्रमुख प्रशासकीय अधिकृत राजु नेपालले पछिल्लो समय धेरै बुहारीहरु गाउँ छोडेर शहर झर्ने प्रवृत्ति बढेको बताउनुहुँदै समाजमा असल बुहारीको खाँचो रहेको बताउनुभयो । यसरी गाउँमै बसेर परिवार र समाजका लागि सहयोग गर्ने बुहारीहरु उदाहरणको पात्र भएको हुँदा स्थानीयले बताएका छन् ।