अदिती बुढाथोकी र धीरज मगर अभिनित फिल्म ‘बाबरी’ दशैंमा रिलिज हुने

नमस्ते चितवन

सोमबार, साउन ३०, २०७९ मा प्रकाशित

साउन ३० , काठमाडौं। फिल्म ‘बाबरी’ असोज १४ गते रिलिज हुने भएको छ । निर्देशक सुरेन्द्र पौडेलले दशैंको फूलपातीको दुई दिनअघि फिल्म रिलिज हुने जानकारी दिए ।त्रिकोणात्मक प्रेमकथामा आधारित फिल्म भदौ ३१ गते आउने तयारीमा थियो । पूर्वनिर्धारित मिति स्थगित गर्दै बाबरीले दशैंलाई प्रदर्शन डेटको रुपमा तय गरेको हो ।यसअघि प्रशान्त तामाङ स्टारर फिल्म ‘परदेशी २’ पोस्टपोन्ड भएर फागुनमा पुगेपछि असोज १४ को मिति खाली थियो ।

फिल्ममा अदिती बुढाथोकी र धीरज मगरको मुख्य भूमिका रहेको छ । अदिति र धिरजसंगै बादल भट्ट, कमणमणी नेपाल, उर्मिला बस्नेत, ध्रुव कोइराला, सुनिता श्रेष्ठ, नितेश गुरुङ, त्रिशला तामाङ, दीलिप गुरुङलगायतका कलाकारहरुको पनि अभिनय छ ।

बाबरी फिल्मको प्रस्तुतिमा निर्माण भएको ‘बाबरी’लाई गणेश बुढाथोकी र पुष्पलता बुढाथोकीले निर्माण गरेका हुन् । फिल्ममा कालीप्रसाद बाँस्कोटा, सुजन चापागाईं र अनमोल गरुङको संगीत तथा एञ्जिला खत्री र विक्रम लामाको कोरियोग्राफी छ ।

पटकथा तथा संवाद रितसिंह बोहरा, सिजन दाहाल, मनोज त्रिपाठी र किशोर नेपालले मिलेर लेखेका हुन् । काठमाडौं, झापा, मोरङ र उत्तरी सिक्किमका रमणीय स्थानमा छायांकन गरिएको छ । नरेन्द्र मैनालीले फिल्म खिचेका हुन् ।