पूजा र आकाशको ‘सम्हालिन्छ कहिले मन’ को ‘हराएँ हराएँ’ गीत सार्वजनिक

नमस्ते चितवन

सोमबार, साउन ३०, २०७९ मा प्रकाशित

साउन ३० , काठमाडौं। सुदर्शन थापा निर्देशित फिल्म ‘सम्हालिन्छ कहिले मन’ को नयाँ गीत ‘हराएँ हराएँ’ सार्वजनिक भएको छ । फिल्मको ट्रेलर दर्शकले रुचाएपछि निर्माण युनिटले यो रोमान्टिक गीत सार्वजनिक गरेको हो ।

यूके र मुस्ताङमा छायांकन भएको गीतमा पूजा शर्मा र आकाश श्रेष्ठको अभिनय छ । ताराप्रकाश लिम्बु र अनु चौधरीले स्वर दिएको गीतमा पूजा र आकाशको रोमान्स सुहाउँदो छ । आनन्द अधिकारीको शब्द तथा ताराप्रकाश लिम्बुको संगीत रहेको गीतमा कोरियोग्राफी कविराज गहतराजले गरेका छन् । गीत दर्शकले मनपराउने अपेक्षा रहेको निर्देशक थापाले बताए ।

महेश दवाडीको लेखन रहेको फिल्ममा पूजा र आकाशका अलवा सोनम तोप्देन, सरोज खनाल, धिरेन शाक्य, गौरी मल्ल लगायतका कलाकारको अभिनय छ । एबी इन्टरनेशनलसँंग भिक्टर सिनेमा लिमिटेडले निर्माण सहकार्य गरेको फिल्ममा अर्जुन पोखरेल, ताराप्रकाश लिम्बु, जेम्स प्रधानको संगीत र अर्जुन जिसीको सम्पादन छ । फिल्म १७ भदौबाट सार्वजनिक प्रदर्शनमा आउँदैछ । फिल्म अमित बस्नेत, अजित केआर थापा र परी रानाले निर्माण गरेका हुन् ।