राष्ट्रिय भूमि आयोग चितवनलाई ४१ हजार बढी भूमिहिन तथा अव्यवस्थित बसोबासीबाट निवेदन

भाद्र ४ ,चितवन ।राष्ट्रिय भूमि आयोग चितवनले ४१ हजार बढी भूमिहिन तथा अव्यवस्थित बसोबासीबाट निवेदन संकलन गरेको छ । जसमध्ये ४ हजार ५ सय ८३ जना भूमिहिन दलित, १२ हजार ८६ जना भूमिहिन सुकुम्बासी, २४ हजार ६ सय ६५ जना अव्यवस्थित बसोबासीले जग्गा प्राप्तिका लागि निवेदन दिएका छन् । भूमि आयोग चितवनका अध्यक्ष बद्री तिमिल्सिनाले डेढ वर्षभित्र भूमि सम्बन्धि समस्या समाधान गरिने बताउनुभएको छ ।

उहाँका अनुसार निवेदन दिएका अधिकाँसले जग्गाको निस्सा लिइसकेका छन् । “भूमिहिन, सुकुम्बासीलाई छिटै लालपुर्जा बाँड्न आतुर छौँ”, उहाँले भन्नुभयो, “करिब ७० प्रतिशत जग्गाको लगत लिने तथा नापजाँचको काम सकिएको छ ।” भरतपुर महानगरमा सबैभन्दा धेरै सुकुम्बासी र अव्यवस्थित बसोबासी रहेका छन् । भरतपुरमा ३ हजार ८ सय ८८ जना भूमिहिन सुकुम्बासी, ५ हजार १ सय ३६ जना अव्यवस्थित बसोबासीले निवेदन दिएका छन् । कहि कतै जग्गा उपभोग नगरेका भूमिहिनलाई भरतपुर–२९ मा जग्गा खोजी गरेर बसोबासको व्यवस्था मिलाउनेबारे अध्ययन समेत भैरहेको बताउनुभयो । भूकम्पपछि स्थानान्तरण भएर अस्थायी रुपमा बसोबास बस्दै आएकाहरुलाई बसोबास गरेकै क्षेत्रमा जग्गा व्यवस्था गर्नेबारे सम्बन्धित पालिकाहरुसँग समन्वय भैरहेको जानकारी दिनुभयो ।

यस्तै माडीको हनुमानझुला (बाँदरझुला) क्षेत्रमा बसोबास गरेका सुकुम्बासी तथा अव्यवस्थित बसोबासीलाई सोही ठाउँमै जग्गा व्यवस्था हुने भएको छ । भूमि आयोगले सो क्षेत्र निकुञ्जको नभई राष्ट्रिय वन क्षेत्रमा पर्ने पहिचान गरेकाले १० वर्ष पहिलेदेखि बसोबास गर्दै आएका, रुख बुट्यान नभएका क्षेत्रमै जग्गा उपलब्ध गराउन सकिने जनाएको छ ।

सो क्षेत्रमा झण्डै ९ सय परिवार बसोबास गर्दछ्न । विगतका आयोगले प्रक्रिया थालेका ४ हजार १ सय ३२ जनालाई समेत जग्गा उपलब्ध गराउने काम सुरु हुन लागेको छ । यसैबीच, २०७७ अगाडी तत्कालिन भूमि आयोग, कार्यदल र समितिबाट वितरण गरेका जग्गाहरुको स्वामित्व वाद दर्ता श्रेस्ता वा नक्सा प्रमाणित लगायतका काममा कुनै त्रुटी भएमा आवश्यक कागजात सहित ३५ दिनभित्र जिल्ला समितिको सचिवालयमा निवेदन पेश गर्न आग्रह गरिएको छ । आयोगले जेठ २२ र साउन ३१ गते दुई दुई पटक ३५ दिने सूचना जारी गरेको छ ।

यस्तै भदौ ५ गते आइतबार भरतपुर–२ का भूमिहिन सुकुम्बासीलाई जग्गा धनी प्रमाण पुर्जा (लालपुर्जा) वितरण कार्यक्रम हुने भएको छ । भरतपुर–२ देवकोटा चोकमा करिब १ सय २० घरपरिवारलाई पुर्जा वितरणको कार्यक्रम रहेको छ । भूमि व्यवस्था, सहकारी तथा गरिवी निवारण मन्त्रालयका मन्त्री शशी श्रेष्ठ मार्फत पुर्जा वितरण हुने जनाइएको छ ।