बहुप्रतीक्षित फिल्म ‘प्रेमगीत ३’को नेपाली र हिन्दी भर्सनमा नयाँ गीत सार्वजनिक

नमस्ते चितवन

बिहिबार, भदौ ०९, २०७९ मा प्रकाशित

भाद्र ९ ,काठमाडौं ।अभिनेता प्रदीप खड्का र अभिनेत्री क्रिस्टिना गुरुङ अभिनित बहुप्रतीक्षित फिल्म ‘प्रेमगीत ३’को नयाँ गीत सार्वजनिक भएको छ ।‘मायाको गाउँ’ बोलको रोमान्टिक गीतमा प्रताप दासको स्वर, सरोज पोखरेलको संगीत र विष्णु भण्डारीको शब्द रचना छ । भिडियोमा अभिनेता प्रदीप खड्का र अभिनेत्री क्रिस्टिना गुरुङ प्रेमिल र भावुक मुद्रामा प्रस्तुत छन् ।

निर्माण टिमले हिन्दी भर्सनमा पनि गीत रिलिज गरेको छ । ‘मायाको गाउँ’ गीतकै दृश्य समेटिएको हिन्दी भर्सनको ‘कोइ न कोइ नाता हैं’ गीतमा भारतीय पार्श्व गायक जुबिन नौटियालको स्वर छ । पवनदीप राजनको कम्पोज रहेको गीतमा रुबी फुलारा र सुभाष कालेको शब्द रचना छ ।

फिल्मलाई स्वर्गीय छेतेन गुरुङ र सन्तोष सेनले संयुक्त रुपमा निर्देशन गरेको हुन् ।फिल्ममा प्रदीप र क्रिस्टिनाका सगै शिव श्रेष्ठ, अनुभव रेग्मी, सम्वृद्धि शाही ठकुरी, सुनिल थापा, मनिष राउत, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा, जीवन भट्टराई, योगिशा खत्री, राज थापालगायतका कलाकारहरुको अभिनय रहेको छ । फिल्मलाई राजेश श्रेष्ठले छायांकन गरेका हुन् ।

हिन्दीमा डब गरेर भारतमा प्रदर्शन हुन लागेको ‘प्रेमगीत ३’ पहिलो नेपाली फिल्म हो । यसअघि सार्वजनिक फिल्मको हिन्दी भर्सनको टिजरलाई दर्शकहरुले मन पराएका छन् । ‘प्रेमगीत ३’ बडा दशैंको अवसर परेर आगामी असोज ७ गतेबाट नेपालसँगै भारतमा एकसाथ प्रदर्शनमा आउदैछ ।