मेयर दाहालद्धारा मेघौली महोसवको उद्घाटन ,मेघौली विश्वमै ‘इको टुरिजम’का लागि नमुना गन्तव्य

नमस्ते चितवन

शनिबार, भदौ ११, २०७९ मा प्रकाशित

भाद्र ११ ,चितवन । भरतपुर महानगरपालिका प्रमुख रेनु दाहालले मेघौलीले विश्वमै ‘इको टुरिजम’(पर्या–पर्यटन) का लागि नमुना गन्तव्य रहेको बताउनुभयो ।मेघौली सँस्कृतिक महोसवको शनिबार उद्घाटन समारोहलाई सम्बोधन गर्दै मेयर दाहालले मेघौली थप प्रचार–प्रासर गरी आन्तरिक तथा बाह्य पर्यटक भित्र्याउन सकिने उल्लेख गर्नुभयो ।

मेयर दाहालले स्थानीय स्तरमा आयोजना हुने मेला महोत्सवले यहाँको कला सँस्कृति, पर्या पर्यटनको प्रचार–प्रसारमा टेवा पुग्ने बताउनुभयो ।मेघौली क्षेत्र नारायणी र राप्ती नदीको संगमस्थल, चितवन राष्ट्रिय निकुञ्ज, सहज सडक पूर्वाधार भएकाले नेपालकै पर्या–पर्यटनको केन्द्र विन्दु भएको उहाँको भनाई थियो ।

नेपालको तेस्रो पर्यटकीय गन्तव्य चितवन र भरतपुरको मुख्य पर्यटकीय स्थल मेघौलीको विकासको लागि पर्यटकीय पूर्वाधारहरु निर्माण हुन क्रम जारी रहेको उल्लेख गर्नुभयो ।‘मेघौली विमानस्थलको स्तरोन्ती भइरहेको छ, उहाँले भन्नुभयो,‘राष्ट्रिय स्तरको इको पार्क निर्माण भइरहेको छ । नारायणी र राप्ती तटबन्धनपछि उकास भएको जमिनमा पार्क निर्माणलाई प्राथामिकता दिइने छ । भरतपुरलाई ग्रीन बेल्टका रुपमा विकास गर्छौ । पर्यटनको लागि यहाँ प्रचुर सम्भावना छ ।’

मेयर दाहालले नारायणी नदीको ४ वटा प्याकेजमा ठेक्का भएर काम सुरु भएको र राप्ती नदीको डिपीआर भई अगामी वर्ष तटबन्धनको काम सुरु हुने जानकारी दिनुभयो ।भरतपुर महानगरपालिकाले दिगो समधान हुने गरी विकास निर्माणको कामलाई अगाडि बढाएकाले देशमै नमुना शहरको रुपमा स्थापित हुदै गएको मेयर दाहालले बताउनुभयो ।