यो कार्यकालमा भाषण कम र काम धेरै गर्छु : प्रधानमन्त्री प्रचण्ड

नमस्ते चितवन

शनिबार, पुष १६, २०७९ मा प्रकाशित

पुस १६ ,चितवन । प्रधानमन्त्री पुष्पकमल दाहाल प्रचण्डले यो कार्यकालमा आफूले भाषण कम र काम धेरै गर्ने बताएका छन् । शनिबार चितवनको नारायणी नमुना माध्यमिक विद्यालयको हिरक महोत्सवको उद्घाटन गर्दै उनले यसपटक भाषण कम गर्ने बताएका हुन् ।

अध्यक्ष दाहालले आफूले यो पटक हरेक दिन जनता, देश, सुशान र विकासको पक्षमा काम गर्दै जाने, नेपाल र नेपाली जनताको आवश्यकता सम्बोधन गर्दै जाने प्रतिवद्धता लिएको बताए । उनले प्रधानमन्त्रीको सपथ ग्रहण गरेलगत्तै पहिलो मन्त्रीपरिषद् बैठकबाट नै देशलाई आर्थिक संकटबाट पार लगाउनुपर्ने, सुशासन कायम गर्ने ऐतिहासिक आवश्यकतालाई ख्याल गर्दै भ्रष्टचार र व्यतिथि नियन्त्रण गर्ने आवश्यकता, जनताले विभिन्न क्षेत्रमा पाइराख्ने सास्तीहरुबाट मुक्त गर्ने आवश्यकतालाई इंगित गरेर नै निर्णय गरेको बताए । ‘जनतालाई पीर मर्कामा पार्ने कुनै पनि निर्णयमाथि कठोर कदम चलाएर जनता र राष्ट्रको पक्षमा नै जाने संकल्प लिएको छु’–प्रधानमन्त्री दाहालले भने ।

उनले देशभरका जनतालाई सुशान र समृद्धिको नयाँ युगको सुत्रपात गर्न एकजुट हुन अपिल समेत गरेका छन् । प्रधानमन्त्री दाहालले देशको विकासको मुख्य पक्ष नै शिक्षा रहेको भन्दै शिक्षाको गुणस्तरले नै अनुशासित र सभ्य समाज बनाउन सकिनेमा जोड दिए । कार्यक्रममा शिक्षा क्षेत्रमा योगदान गर्ने विभिन्न व्यक्तित्वहरुलाई सम्मान समेत गरिएको थियो । चितवनको नमुना विद्यालयको रुपमा रहेको नारायणी नमुना माध्यमिक विद्यालय ६० वर्षअघि टुकीको साहारामा अध्यापन सुरु भएको थियो ।