सर्वदलीय बैठक सकियो, व्यवस्था जोगाउन सबै दल एक हुने प्रतिबद्धता

नमस्ते चितवन

मङ्गलबार, कार्तिक २१, २०८० मा प्रकाशित

काठमाडौं, कार्तिक २१
शान्ति सम्झौता गर्ने प्रमुख दलका शीर्ष नेताबीचको सर्वदलीय बैठक सकिएको छ । प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकमा विशेषगरी १२ बुँदे समझदारीमा हस्ताक्षर गर्ने दल र तिनका नेताबीच समसामयीक पछिल्लो राजनीति विषयबस्तुमा छलफल भएको बैठकमा सहभागि नेताहरुले बताएका छन् ।

शान्ति, संविधान र व्यवस्थाप्रति आक्रमण र भड्काउने प्रयास भइरहेको त्यसबारेमा सबै दलका नेताले धारणा राखेको बैठकमा सहभागि नेपाली काँग्रेसका नेतासमेत रहेका अर्थमन्त्री डा.प्रकाशशरण महतले जानकारी दिनु भयो । महतका अनुसार बैठक विशेष गरी व्यवस्था जोगाउने कुरामा सबैको एक मत भएको छ ।

बैठकमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, पूर्वप्रधानमन्त्री डा.बाबुराम भट्टराई लगायतका नेताको सहभागिता थियो । छलफलमा सहभागी दलले संघीय लोकतान्त्रिक गणतन्त्र बचाउनुपर्नेमा प्रतिवद्धता जनाएका अर्थमन्त्री महतले बताउनु भएको छ ।

परिवर्तनकारी राजनीतिक दलका नेता खासगरी कांग्रेस, एमाले र माओवादीका शीर्ष नेताले गणतन्त्र, संघीयता र संविधानप्रति प्रतिबद्ध रहेको धारणा राखेको भन्दै त्यसका लागि आगामी दिनमा एकताबद्ध भएर अगाडि बढ्ने प्रतिबद्धता जनाएको उहाँको भनाई छ । छिटपुट रुपमा विभिन्न कोणबाट व्यवस्थाप्रति भइरहेका प्रहार र तिनको मिलेर प्रतिवाद गर्ने सबैको अभिमत आएको महतले बताउनु भयो ।