यस्तै, मन्त्री पुनले आन्तरिक राजस्व विभागको महानिर्देशकबाट भुपाल बराललाई सरुवा गरेर उनको ठाउँमा सहसचिव शिवलाल तिवारीलाई ल्याएका छन् । तिवारी यसअघि ठुला करदाता कार्यालय प्रमुख थिए । कर्मचारीको सरुवा, विभाग तथा महाशाखामा स्थानान्तरणसँगै अर्थमन्त्री पुन बजेटको तयारीमा लागेको स्रोतले बताएको छ ।

१८ खर्बभन्दा माथिको बजेट ल्याउने तयारी

अर्थमन्त्री पुनले आर्थिक शिथिलताकै बिच १८ खर्बभन्दा माथिको बजेट ल्याउने तयारी गरेका छन् । समस्याका बेला बजेट घटाएर भन्दा पनि केही आकार बढाएर ल्याउनुपर्ने र आर्थिक गतिरोध अन्त्य गर्नुपर्ने मनस्थितिमा अर्थमन्त्री पुन रहेको उनको निजी सचिवालयले जनाएको छ ।

तर, विनियोजन विधेयक, २०८१ को सिद्धान्त तथा प्राथमिकता ९कर बाहेक० माथिको छलफलमा सांसद तथा विज्ञहरूले सरकारले बजेटको आकार ठुलो ल्याउनेभन्दा पनि व्यावहारिक पक्षलाई हेरेर १६ देखि १७ खर्ब हाराहारीमा ल्याउन सुझाव दिएका थिए ।

चालु आर्थिक वर्षका लागि सरकारले १७ खर्ब ५१ अर्ब ३१ करोड रुपैयाँ बराबरको बजेट ल्याएको थियो । तर, स्रोतको अभावका बिच सो बजेट समेत खर्च गर्न नसक्ने स्थिति देखिएपछि सरकारले अर्धवार्षिक समीक्षामार्फत विनियोजित बजेटको खर्चको लक्ष्य २ खर्ब २१ अर्बले घटाउँदै १५ खर्बमा झारेको थियो ।

यो अनुभवबाट समेत पाठ सिक्दै सरकारले आगामी आर्थिक वर्षको बजेट कार्यान्वयन गर्न सकिने गरी ल्याउनुपर्ने माग उठेको छ ।

राष्ट्रिय योजना आयोगले सरकारलाई आगामी आर्थिक वर्षका लागि १८ खर्ब रुपैयाँसम्मको बजेट ल्याउन सक्नेगरी सीमा ९सिलिङ० दिएको छ । आवश्यकताका आधारमा सरकारले यसमा केही तलमाथि गरेर बजेट ल्याउन सक्छ ।