‘काजी’मार्फत फरक स्वादको प्रेमकथा ल्याउँदै विपिन कार्की

काठमाडौं । आगामी जेठ ८ गतेबाट प्रदर्शनमा आउन लागेको नेपाली चलचित्र ‘काजी’ यतिबेला चर्चामा छ । ट्रेलर र गीत सार्वजनिक भएपछि दर्शकमाझ चलचित्रप्रतिको उत्साह झन् बढ्दो छ । यसैबीच चलचित्रका मुख्य अभिनेता विपिन कार्कीले ‘काजी’को कथा, आफ्नो पात्र र अभिनय अनुभवबारे खुलेर कुरा गरेका छन् ।

विपिनका अनुसार ‘काजी’ आफूले यसअघि काम गरेका चलचित्रभन्दा फरक स्वादको प्रेमकथामा आधारित छ । सुरुमा चलचित्रको कथा अर्कै भए पनि पछि निर्माण टिमले नयाँ कथा लिएर पुनः प्रस्ताव गरेको उनले बताए ।

‘पहिले अर्कै कथामा काम गर्ने कुरा भएको थियो । पछि टिम फेरियो र नयाँ कथासहित मसँग पुनः कुरा भयो । अहिले बनेको कथा एकदमै फरक र मन छुने खालको छ,’ विपिनले भने ।

उनका अनुसार चलचित्रले प्रेमलाई केवल ठूला संवाद वा भावनात्मक अभिव्यक्तिमा सीमित नगरी दैनिक जीवनका साना व्यवहार र सम्बन्धभित्र खोजेको छ । श्रीमान–श्रीमतीबीचको समझदारी, त्याग र एकअर्काको खुसीमा आफ्नो खुसी खोज्ने भावनालाई चलचित्रले सुन्दर ढंगले प्रस्तुत गरेको उनको भनाइ छ ।

‘प्रेम भनेको ठूला कुरा मात्रै होइन । व्यवहारका साना–साना कुरामा पनि प्रेम लुकेको हुन्छ । ‘काजी’ले त्यही भावलाई निकै सूक्ष्म तरिकाले देखाएको छ,’ उनले भने, ‘फिल्म हेरेपछि दर्शकले “काजी–कजिनीको प्रेम पो प्रेम” भन्नुहुनेछ भन्ने विश्वास छ ।’

विपिनले आफू पनि वैवाहिक जीवन बाँचिरहेको व्यक्ति भएकाले पात्रसँग सजिलै जोडिन सकेको बताए । उनले ‘काजी’को चरित्रलाई आफ्नै जीवनसँग नजिक महसुस गरेको सुनाए ।

‘म आफैँ पनि श्रीमान् हुँ, त्यसैले पात्रका धेरै भावना मैले जीवनमै अनुभव गरिरहेको छु । अरू केही फिल्ममा जस्तो धेरै तयारी गर्नुपरेन,’ उनले भने ।

चलचित्रको परिवेश २०५० सालअघिको रहेको र आफूले निभाएको पात्र ‘काजी खानदान’को विरासत बोकेको युवक भएको उनले जानकारी दिए । प्रेममा डुबेको र बाहिरी संसारसँग खासै मतलब नराख्ने यो पात्र आफूले यसअघि नगरेको खालको भएकाले चुनौतीपूर्ण अनुभव भएको उनले बताए ।

अभिनयबारे बोल्दै विपिनले आफूले हरेक पात्रलाई फरक बनाउने प्रयास गर्ने गरेको बताए । दर्शकको अपेक्षाले जिम्मेवारी बढाएको उल्लेख गर्दै उनले अझ राम्रो काम गर्ने प्रयास जारी रहने बताए ।

चलचित्रको ट्रेलर र गीतप्रति दर्शकबाट सकारात्मक प्रतिक्रिया आइरहेको भन्दै उनले ‘काजी’ अहिलेका नेपाली चलचित्रभन्दा फरक स्वादको फिल्म भएको दाबी गरे । विशेषगरी ‘वारि बर पारि पिपलु’ गीत टिकटकमा भाइरल भइरहेकाले पनि चलचित्रको माहोल राम्रो बनेको उनको भनाइ छ ।

सामाजिक सञ्जाल र डिजिटल प्लेटफर्मले चलचित्र प्रचारमा ठूलो सहयोग पुगेको उल्लेख गर्दै उनले राम्रो कथा, बलियो प्रस्तुति र टिमवर्क नै दर्शकलाई हलसम्म तान्ने मुख्य आधार भएको बताए ।

चलचित्रमा विपिनसँगै अभिनेत्री केकी अधिकारीको मुख्य भूमिका रहेको छ । विपिनका अनुसार निर्देशक, निर्माता र सम्पूर्ण कलाकार टोलीले इमान्दारीपूर्वक मेहनत गरेका छन् ।

दर्शकलाई चलचित्र हेर्न आग्रह गर्दै उनले ‘काजी’ले कसैलाई निराश नबनाउने विश्वास व्यक्त गरे ।

‘यो घर–घरको कथा हो । दर्शकले आफूलाई पात्रहरूसँग जोड्न सक्नुहुन्छ । अहिले आइरहेका फिल्ममध्ये फरक दृष्टिकोणको चलचित्र बनेको छ,’ उनले भने ।

लक्ष्मण रिजालको निर्देशनमा तयार भएको चलचित्रमा विपिन कार्की, केकी अधिकारी, गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउँवाला गौतम लगायत कलाकारहरूको अभिनय रहेको छ ।

प्रदीप भारद्वाजको कथा रहेको चलचित्रलाई रामप्रसाद रिजालले प्रस्तुत गरेका हुन् । रिजाल एण्ड रिजाल प्रोडक्सनको ब्यानरमा निर्माण भएको चलचित्रमा नेहान रिजाल र विकासराज जोशी निर्माता रहेका छन् ।

चलचित्रमा चिन्तन राजभण्डारीको छायांकन, कालीप्रसाद बास्कोटाको संगीत, कविराज गहतराजको नृत्य निर्देशन, ओजस्वी ओझाको प्रोडक्सन डिजाइन, श्याम कुँवरको रंग संयोजन, सागर अर्यालको साउण्ड डिजाइन, सुजिल कर्माचार्यको पार्श्व संगीत र विपिन मल्लको सम्पादन रहेको छ ।

‘काजी’लाई श्रीराम बालाजी फिल्मस्ले वितरण गर्ने जिम्मेवारी लिएको छ ।

मङ्गलबार, जेठ ०५, २०८३ मा प्रकाशित