दयाहाङ–सौगातको ‘मितज्यू’ र विपिन–केकीको ‘काजी’ आजदेखि हलमा

नमस्ते चितवन

शुक्रबार, जेठ ०८, २०८३ मा प्रकाशित

काठमाडौं, जेठ ८ । नेपाली चलचित्रप्रेमीका लागि आजदेखि दुई बहुप्रतीक्षित चलचित्र ‘मितज्यू’ र ‘काजी’ देशभरका सिनेमाघरमा प्रदर्शनमा आएका छन् । फरक कथावस्तु र शैलीमा निर्माण भएका यी दुवै चलचित्रले दर्शकमाझ उत्साह पैदा गरेका छन् ।

निर्देशक अनिल बुढामगरको निर्देशनमा बनेको चलचित्र ‘मितज्यू’ ग्रामीण परिवेश, मित्रता, प्रेम र सम्बन्धको कथामा आधारित छ । चलचित्रमा अभिनेता दयाहाङ राई र सौगात मल्ल मुख्य भूमिकामा छन् भने चर्चित नृत्यांगना तेरिया फौजा मगरले यसै चलचित्रमार्फत अभिनेत्रीका रूपमा डेब्यु गरेकी छन् । सार्वजनिक ट्रेलर, गीत तथा प्रचार सामग्रीले चलचित्रप्रति दर्शकको चासो बढाएको छ ।

यता निर्देशक लक्ष्मण रिजालको चलचित्र ‘काजी’ पनि आजैबाट प्रदर्शनमा आएको छ । काजी र कजिनीको प्रेमकथामा आधारित यस चलचित्रमा अभिनेता विपिन कार्की र अभिनेत्री केकी अधिकारी मुख्य भूमिकामा छन् । प्रेम, त्याग, विश्वास र सम्बन्धको भावनात्मक कथालाई केन्द्रमा राखेर निर्माण गरिएको चलचित्रका गीत तथा ट्रेलरले सकारात्मक प्रतिक्रिया प्राप्त गरिरहेका छन् ।

दुवै चलचित्रले प्रदर्शनअघि नै देशभरका प्रमुख मल्टिप्लेक्स तथा सिंगल स्क्रिन हलहरूमा उल्लेख्य शो प्राप्त गरेका छन् । अग्रिम टिकट बुकिङमा समेत दर्शकको राम्रो उत्साह देखिएको वितरकहरूले बताएका छन् ।

एकातिर ग्रामीण जीवन, मित्रता र द्वन्द्वको कथा बोकेको ‘मितज्यू’ छ भने अर्कोतर्फ प्रेम र पारिवारिक सम्बन्धको भावनात्मक कथावस्तुमा आधारित ‘काजी’ रहेको छ । फरक स्वादका यी दुई चलचित्र एकै दिन प्रदर्शनमा आउँदा नेपाली बक्स अफिसमा रोचक प्रतिस्पर्धा हुने अपेक्षा गरिएको छ ।

चलचित्रकर्मीहरूका अनुसार नेपाली चलचित्रप्रति दर्शकको आकर्षण बढिरहेको वर्तमान अवस्थामा ‘मितज्यू’ र ‘काजी’ दुवैले राम्रो व्यापार गर्ने सम्भावना रहेको छ । अब भने दर्शकले कुन चलचित्रलाई बढी रुचाउँछन् भन्ने चासो बढेको छ ।