कुलब्वाय र दिव्याको प्रेमकथा ‘बेहुली’को इन्डक्ल्याप

नमस्ते चितवन

शुक्रबार, जेठ ०८, २०८३ मा प्रकाशित

काठमाडौं, जेठ ०८
पारस बम ठकुरी (कुलब्वाय), दिव्या रायमाझी र शुशान्त कार्की अभिनीत बहुप्रतीक्षित नेपाली चलचित्र ‘बेहुली’ को छायांकन सम्पन्न भएको छ। निर्माण टिमका अनुसार ४५ दिनमा मुख्य छायांकन सकिएको हो भने दुई वटा गीतको दृश्यांकन अझै बाँकी रहेको छ।

‘द डिभाइन म्युजिक’ र ‘सम्मान इन्टरटेन्मेन्ट’ को प्रस्तुतिमा निर्माण भएको चलचित्र आगामी भदौ १२ गते, जनैपूर्णिमाको अवसर पारेर प्रदर्शनमा आउने तयारीमा छ। हरितालिका तीज नजिकै रिलिज हुने भएकाले चलचित्रको कथा र पर्वको भावनात्मक सन्दर्भबीच विशेष सामञ्जस्य रहने विश्वास निर्माण पक्षको छ।

चलचित्रमा कुलब्वाय र दिव्या रायमाझीको जोडीलाई लिएर दर्शकमाझ विशेष उत्सुकता देखिएको छ। ‘होस्टेल ३’ बाट चलचित्र यात्रा सुरु गरेका कुलब्वाय यसपटक परिपक्व प्रेमकथामा दिव्यासँग रोमान्टिक भूमिकामा देखिनेछन्। उनीहरूको पर्दाको केमेस्ट्री कस्तो रहनेछ भन्ने चासो अहिले नै बढ्न थालेको छ।

चर्चित संगीतकार अर्जुन पोखरेल पहिलोपटक निर्माता बनेको यस चलचित्रको निर्देशन सशान कँडेल ले गरेका छन् भने कथा माधव शर्मा को रहेको छ। ‘होस्टेल ३’ मा सफल सहकार्य गरेको निर्देशक–लेखक जोडीले ‘बेहुली’ मा पनि निरन्तरता पाएका छन्।

फिल्ममा पदम तामाङ, सन्तोष बनियाँ, सरिता गिरी, विशाल पहारी, कर्मा लामा, दीपक गौली, विमल यादव, अबिरल श्रेष्ठ, सबिन कट्टेल र समायरा थापा मगरलगायत कलाकारहरूको अभिनय रहेको छ।

चलचित्रका कार्यकारी निर्माता सुमन थिङ तामाङ हुन् भने दुर्गा खरेल र रमेश सिलवाल सह–निर्माताका रूपमा रहेका छन्। शंकर कोइराला क्रिएटिभ प्रोड्युसर रहेको चलचित्रमा नरेन्द्र मैनाली को छायांकन, विकास दाहाल को सम्पादन र रोशन श्रेष्ठ को द्वन्द्व निर्देशन रहेको छ।

मुख्य सहायक निर्देशक सुदीप कुँवर, सहायक निर्देशक योगेन्द्र कार्की र मार्लोभ ढुङ्गाना रहेका छन् भने प्रोडक्सन हेडको जिम्मेवारी यमप्रसाद ओली ले सम्हालेका छन्। राजु वाइबा को मेकअप, किशोर नेपाल को प्रोडक्सन डिजाइन, एलेक्स बसुकला को पोशाक डिजाइन तथा रोयल भीमसेन (ट्राइडेन्ट कन्सेप्ट) को पब्लिसिटी डिजाइन रहेको छ।

चलचित्रलाई काठमाडौं उपत्यकाभित्र काफिया फिल्म्स र मोफसलमा श्री व्यंकटेश इन्टरटेन्मेन्ट ले वितरण गर्नेछन् भने यसको डिजिटल अधिकार ओएसआर डिजिटल ले प्राप्त गरेको छ। छायांकन सकिएसँगै निर्माण टिम अब पोस्ट–प्रोडक्सनको काममा जुटेको छ।

शुक्रबार, जेठ ०८, २०८३ मा प्रकाशित