सरकारले बालकुमारी घटनाका सम्बन्धमा छानबिन गर्न पूर्व न्यायाधीशको अध्यक्षतामा उच्‍चस्तरीय जाँचबुझ आयोग गठन गर्ने भएको छ । आज बस्ने मन्त्रिपरिषद् बैठकले घटनाको न्यायिक छानबिनका लागि उच्‍चस्तरीय जाँचबुझ आयोग गठन गर्ने भएको हो ।

गठन भएपछि आजैदेखि आयोगले कार्य प्रारम्भ गर्ने प्रधानमन्त्रीका प्रेस सल्लाहकार गोविन्द आचार्यले गोविन्द आचार्यले जनाएका छन् ।

उनका अनुसार प्रधानमन्त्री पुष्पकमल दाहाल ‘प्रचण्ड’ले गृह मन्त्रालयलाई उच्चस्तरीय जाँचबुझ आयोग गठनसम्बन्धी प्रस्ताव ल्याउन आइतबार निर्देशन दिएका थिए ।

आइतवार बसेको सत्ता गठबन्धको बैठकमा समेत प्रचण्डले आयोग गठनका लागि भइरहेको तयारीका सम्बन्धमा जानकारी गराएका थिए ।

कोरियाली भाषा परीक्षामा सहभागी हुन नपाएको विषयलाई लिएर भएको आन्दोलनका क्रममा प्रहरीले हस्तक्षेप गर्दा शुक्रबार ललितपुरको बालकुमारीमा दुई युवकको मृत्यु भएको थियो । घटनामा अछामका वीरेन्द्र शाह र दैलेखका सुजन रावतको मृत्यु भएको थियो । साथै भौतिक पूर्वाधार तथा यात्रायात मन्त्री प्रकाश ज्वाला सरकारी गाडीमा आगजनी भएको थियो ।

गृहमन्त्रालयले सोही दिन घटनाको छानबिनका लागि समिति गठन गरेको थियो । सरकारले मृतकका परिवारलाई १०/१० लाख रुपैयाँ दिने घोषणासमेत गरिसकेको छ ।