विराट कोहलीको ७७ रनले बैंगलुरूको जित

नमस्ते चितवन

मङ्गलबार, चैत १३, २०८० मा प्रकाशित

काठमाडौं ,चैत्र १३
विराट कोहलीको अर्धशतकप्रेरित रोयल च्यालेन्जर्स बैंगलुरूले इन्डियन प्रिमियर लिग (आईपीएल)मा पञ्जाब किंग्सलाई पराजित गरेको छ। सोमबार राति सम्पन्न खेलमा बैंगलुरूले पञ्जाबलाई ४ विकेटले पराजित गरेको हो।

बैंगलुरूको यो पहिलो जित हो। शुक्रबार सम्पन्न उद्धघाटन खेलमा साविक विजेता चेन्नई सुपर किंग्सले बैंगलुरूलाई ६ विकेटले पराजित गरेको थियो। पञ्जाबले भने आफ्नो पहिलो खेलमा दिल्ली क्यापिटल्सलाई ४ विकेटले पराजित गर्दै सिजनको सुखद् शुरूआत गरेको थियो।

पञ्जाबले दिएको १७७ रनको लक्ष्य पछ्याएको बैंगलुरूले ४ बल बाँकी रहँदा ६ विकेट गुमाउँदै १७८ रन बनायो।बैंगलुरूका विराट कोहलीले सर्वाधिक ७७ रन बनाए। ४९ बल खेलेका उनले ११ चौका र २ छक्का प्रहार गरे।

रजत पाटिदार १८ र अनुज रावत ११ रनमा आउट हुँदा दिनेश कार्तिक २८ र महिपाल लोमरोर १७ रनमा अविजित रहे।ग्लेन मैक्सवेल, कप्तान फाफ डूप्लेसी र क्यामरून ग्रिन ३/३ रन बनाएर पेभिलियन फर्किए।पञ्जाबका हरप्रीत बराडा र कगिसो रबाडाले २/२ विकेट लिए। हर्षल पटेल र साम करनको नाममा १/१ विकेट रह्यो।

त्यसअघि बैंगलुरूस्थित एम चिन्नास्वामी स्टेडियममा टस हारेर पहिला ब्याटिङ थालेको पञ्जाबले निर्धारित २० ओभरमा ६ विकेट गुमाउँदै १७६ रन बनाएको हो।

पञ्जाबका कप्तन शिखर धावनले सर्वाधिक ४५ रन बनाए। उनले ३७ बलमा ५ चौका र १ छक्का प्रहार गरे।जितेश शर्मा २७, प्रभसिमरन सिंह २५,सैम कुरन २३, लियम लिविगस्टन १७ र जोनी बेयरस्टो ८ रनमा आउट भए।शशांक सिंह २१ र हरप्रीत बरोडा २ रनमा अविजित रहे।
बैंगलुरूका ग्लेन मैक्सवेल र मोहम्मद सिराजले २/२ विकेट लिए। अल्जारी जोसेफ र यश दयालको नाममा १/१ विकेट रह्यो।