कादम्बरी दाना श्रेष्ठको ‘इमा’ भव्य समारोहबीच लोकार्पण

काठमाडौं । साहित्यकार तथा गीतकार कादम्बरी दाना श्रेष्ठको नवीन साहित्यिक कृति ‘इमा’ राजधानी काठमाडौंमा एक विशेष समारोहबीच भव्य रूपमा लोकार्पण गरिएको छ । चलचित्र विकास बोर्ड परिसरमा आयोजित उक्त समारोह साहित्य, संगीत र मानवीय संवेदनाले भरिपूर्ण बनेको थियो ।

राष्ट्रियसभा सदस्य डा. अञ्जना शाक्य प्रमुख अतिथिका रूपमा सहभागी रहेको कार्यक्रममा इजरायली राजदूत इस्मुलीक एल्विस, गीतकार संघ नेपालका अध्यक्ष वसन्त वित्यासी थापा, संगीतकार संघ नेपालका उपाध्यक्ष शंकर थापा ‘स्माइल’ लगायत साहित्य, संगीत र सामाजिक क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो ।

कार्यक्रममा प्रमुख अतिथि, विशिष्ट अतिथि तथा अन्य अतिथिहरूले संयुक्त रूपमा ‘इमा’ कृतिको लोकार्पण गरेका थिए । लोकार्पणपछि उपस्थित अतिथिहरूले लेखिका कादम्बरी दाना श्रेष्ठको सिर्जनात्मक यात्राको खुलेर प्रशंसा गरेका थिए ।

वैदेशिक रोजगारीका क्रममा इजरायलमा केयर गिभरको रूपमा काम गर्दै साहित्य सिर्जना गर्नु आफैंमा प्रेरणादायी रहेको वक्ताहरूले बताएका थिए । स्वागत मन्तव्यका क्रममा पेमा डोल्मा डेल्मुले कठिन परिस्थितिबीच पनि लेखिकाले आफ्ना अनुभवलाई सशक्त साहित्यिक कृतिमा रूपान्तरण गरेको उल्लेख गरिन् ।

लेखिका कादम्बरी दाना श्रेष्ठले ‘इमा’ पुस्तक आफ्ना वैदेशिक जीवनका अनुभव, संघर्ष, पीडा, आत्मीयता र आमाप्रतिको भावनाको समर्पण भएको बताइन् । ‘इमा’ इजरायली भाषामा ‘आमा’ भन्ने अर्थ राख्ने शब्द हो । पुस्तकमा वैदेशिक भूमिमा नेपाली श्रमिकहरूले भोग्ने भावनात्मक संघर्ष, सांस्कृतिक सम्बन्ध र मानवीय संवेदनाका विविध पक्षलाई समेटिएको छ ।

विशेष रूपमा यो कृति इजरायलमा उनकी रोजगारदाता रहनुभएकी दिवंगत माया वाइनको सम्झनामा समर्पित गरिएको छ । लेखिकाले माया वाइनसँग बिताएका आत्मीय क्षण, प्रेम, संघर्ष र सम्बन्धलाई पुस्तकमार्फत जीवन्त बनाउने प्रयास गरेकी छन् ।

इजरायली राजदूत इस्मुलीक एल्विसले नेपाल–इजरायलबीचको सांस्कृतिक र मानवीय सम्बन्ध सुदृढ बनाउन यस्ता साहित्यिक कृतिहरू महत्वपूर्ण हुने बताए । प्रमुख अतिथि डा. अञ्जना शाक्यले ‘इमा’लाई हजारौं नेपाली केयर गिभरहरूको साझा अनुभव र संघर्षको प्रतिनिधित्व गर्ने संवेदनशील दस्तावेजको रूपमा व्याख्या गरिन् ।

समारोहको अन्त्यमा अतिथिहरूलाई सम्मानपत्र तथा मायाको चिनो प्रदान गरिएको थियो । ‘इमा’ केवल पुस्तक विमोचन नभई वैदेशिक भूमिमा संघर्षरत नेपालीहरूको जीवन, संवेदना र आमाप्रतिको समर्पणलाई उजागर गर्ने भावनात्मक उत्सवका रूपमा स्थापित भएको सहभागीहरूको धारणा थियो।

सोमबार, जेठ ०४, २०८३ मा प्रकाशित