बालकुमारी घटनामा घाइते भएका व्यक्तिहरूको सम्पूर्ण उपचार खर्च नेपाल सरकारले व्यहोर्ने

नमस्ते चितवन

शनिबार, पुष १४, २०८० मा प्रकाशित

आज बसेको मन्त्री परिषद्को निर्णयले घटनाको सम्बन्धमा निष्पक्ष छानबिन गरी दोषीलाई कडा कारबाही गर्ने निर्णय गरेको छ । २०८० पुस १४ गते बसेको मन्त्रिपरिषद बैठकले उक्त निर्णय गरेको हो । बैठकले निधन भएकाका परिवारलाई प्रतिपरिवार दश लाख रुपैयाँ उपलब्ध गराउने र घटनामा परी घाइते भएका व्यक्तिहरूको सम्पूर्ण उपचार खर्च नेपाल सरकारले व्यहोर्ने निर्णय गरेको छ ।

भविष्यमा यस्ता प्रकृतिका घटना हुन नदिन गृह मन्त्रालयले सुरक्षा संयन्त्र र अन्य सम्बद्ध निकायलाई थप सतर्क, संयमित र प्रभावकारी बनाउने पनि निर्णय गरेको छ । आज दिउसो बसेको मन्त्रीपरिषद्को निर्णयले आगामी दिनमा यस किसिमका घटना हुन नदिन र शान्ति सुरक्षा कायम गर्न नेपाल सरकार प्रतिबद्ध रहेकाले यस घटनालाई संयमतापूर्वक लिई शान्ति सुरक्षाको वातावरण बिग्रन नदिन सबैलाई अपील गरेको छ ।

घटनास्थलमा गोलि हान्न आदेश दिने प्रहरी अधिकृत, भौतिक पुर्वाधार तथा यातायात मन्त्रीको सुरक्षा प्रमुख र नेपाल सरकारका इपिएस कोरिया शाखा प्रमुखलाई निलम्बन गरि छानबिनको प्रक्रिया अघि बढीसकेको सरकारको प्रवक्ता समेत रहनु भएके सूचना तथा सञ्चार प्रविधि मन्त्री रेखा शर्माले जानकारी दिनुभयो । पुष १३ गते ललितपुरको बालकुमारी क्षेत्रमा भएको घटनामा दैलेखका सुजन राउत र अछामका वीरेन्द्र शाहको दुःखद् निधन भएको थियो ।

मन्त्रीपरिषद्को बैठकले घटनाका मृतकहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारप्रति हार्दिक समवेदना व्यक्त गरि घटनाका घाइतेहरूको शीघ्र स्वास्थ्यलाभको कामना गरेको छ ।