नेपाली कांग्रेसले राष्ट्रिय सभा चुनावमा तालमेल गर्ने निर्णय गरेको छ। पुस १२ गतेदेखि १४ गतेसम्म सानेपामा बसेको केन्द्रीय समिति बैठकले सत्ता गठबन्धनसँग चुनावी तालमेल गर्ने निर्णय गरेको हो।
‘राष्ट्रिय सभाको निर्वाचनका लागि सत्तारूढ गठबन्धनमा आबद्ध दलहरूको बीचमा हुने सहमतिका आधारमा साझा उम्मेदवार बनाउने’ भन्दै कांग्रेस चुनावी तालमेलको निर्णयमा पुगेको हो। साथै कांग्रेसले पार्टीबाट उम्मेदवार छनोट गर्न मापदण्डसमेत बनाएको छ। माघ ११ मा हुने चुनावका लागि यही पुस २३ उम्मेदवारी दर्ताको कार्यक्रम छ।
कांग्रेसले राष्ट्रिय सभामा १० सिट दाबी गरे पनि गठबन्धनका दलहरूभित्र सिट भागबन्डाको विषयमा सहमति भइसकेको छैन। राष्ट्रिय सभामा सरकारको सिफारिसमा राष्ट्रपतिबाट नियुक्त हुने एकसहित २० सिट रिक्त हुने भएकोले चुनाव गर्न लागिएको हो।
कांग्रेसभित्र यसपालि राष्ट्रिय सभामा नयाँ अनुहारलाई प्राथमिकता दिन आवाज उठेको छ। तर चुनाव हारेका र समानुपातिक सूचीमा नाम भएकाहरूले नाम फिर्ता लिएर आकांक्षा देखाइरहेका छन्।
कांग्रेसले पार्टी विधानको धारा ३२ को ९ अनुसार प्रदेश कार्यसमितिको सिफारिसमा संसदीय बोर्डबाट उम्मेदवार टुंगो लगाउने तयारी गरेको छ।
प्रचार विभाग प्रमुख मीनबहादुर विश्वकर्माले ठूलो संख्यामा आकांक्षीका नाम केन्द्रीय कार्यालयमा प्राप्त भएको बताए। उनकाअनुसार अब संसदीय बोर्डमा ती नामबारे छलफल गरी उम्मेदवार तय गरिनेछ।
केन्द्रीय समितिले राष्ट्रिय सभा उम्मेदवार चयनका लागि मापदण्ड पनि बनाएको छ। जिल्ला र प्रदेशबाट सिफारिस भई आएका नामहरूमध्ये भौगोलिक तथा जातीय क्षेत्रीय सन्तुलन समेतलाई ध्यान दिई योगदान गरेकालाई प्राथमिकता दिने मापदण्ड बनेको छ। साथै संसदीय क्षेत्रमा योगदान पुर्याउन सक्ने क्षमता भएका, पार्टीप्रति प्रतिबद्ध र स्वच्छ छवि भएकालाई पनि प्राथमिकता दिइने भएको छ।
हालसम्म कुनै पनि अवसर नपाएका वा विभिन्न कारणले अवसरबाट वञ्चित भएका योग्य तथा लोकप्रिय व्यक्तिलाई उम्मेदवार बनाउने गरी मापदण्ड नै बनाइएको विश्वकर्माले जानकारी दिनुभयो।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.