ग्यासको खपत बिस प्रतिशतले वृद्धि

नमस्ते चितवन

सोमबार, पुष ०८, २०८१ मा प्रकाशित

चिसो मौसम सुरु भएसँगै बजारमा खाना पकाउने एलपी ग्यासको खपत बढ्न थालेको छ ।

अन्य समयको तुलनामा चिसो समयमा ग्यासको प्रयोग धेरै हुने हुँदा खपत बढेको हो । चिसो मौसममा खाना पकाउनुका साथै ग्यास गिजरको प्रयोग पनि बढ्छ ।

नेपाल एलपी ग्यास उद्योग सङ्घका अध्यक्ष शिवप्रसाद घिमिरेले अन्य समयको तुलनामा चिसो मौसममा १५ देखि २० प्रतिशत ग्यासको खपत बढ्ने बताउनुभयो । विगतका वर्षमा चिसो समयमा २५ देखि ३० प्रतिशत ग्यासको माग बढ्ने गरेकोमा पछिल्लो समय २० प्रतिशतमा झरेको उहाँको भनाइ छ । चिसो समयमा बजारमा ग्यासको माग बढ्दै गए पनि सो अनुपातमा आपूर्ति नियमित नहुँदा अभाव देखिने गरेको उहाँको भनाइ छ । उहाँका अनुसार चार वर्षदेखि ग्यासको कोटा बढाइएको छैन तर ग्यास सिलिन्डर प्रमाणीकरण गरी थप सिलिन्डर सङ्ख्या २३ लाख पुगेको छ । सङ्घका अनुसार बजारमा एक करोड ५७ लाख सङ्ख्यामा सिलिन्डर रहेका छन् ।

ग्यासभन्दा बिजुली सस्तो पर्ने हुँदा विद्युतीय चुलोको प्रयोग बढ्दै छ तर बेला बेला बिजुली जाने समस्याले गर्दा पनि भरपर्दो ग्यास नै बन्ने गरेको छ । निगमले मासिक ४५ हजार मेट्रिक टन ग्यासको कोटा निर्धारण गरेको छ । अन्य समयमा ग्यासको खपत कम हुँदा ग्यास पर्याप्त हुने र चिसो समयमा ग्यासको माग बढी हुने गर्छ ।

नेपाल ग्यास विक्रेता महासङ्घका अध्यक्ष चन्द्र थापाले पनि बजारमा ग्यासको माग बढ्दा आपूर्ति नियमित नहुँदा सामान्य अभाव देखिएको बताउनुयो ।

निगमले ग्यासको खरिद आदेश जारी गरेपछि ग्यास उद्योगीले भारतीय आयल कर्पोरेसन्स (आइओसी) को बरौनी, दुर्गापुर, पारादीप, हल्दिया, मथुरा रिफाइनेरीबाट ग्यास आयात गर्ने गर्छन्  । ५९ वटा ग्यास उद्योगले भारतका विभिन्न रिफाइनरी केन्द्रमा गएर ग्यास ल्याएर नेपालमा वितरण गर्दै आएका छन् । ग्यासको ढुवानी भने भारतीय ट्रान्सपोर्टरमार्फत ग्यास ढुवानी हुन्छ । निजी क्षेत्रसँग आठ हजार मेट्रिक टन ग्यासको भण्डारण क्षमता रहे पनि निगमसँग ग्यासको भण्डारण छैन । जसको कारणले नियमित रूपमा बजारमा ग्यासको आपूर्ति नभए अभाव हुने गर्छ ।