वीरगन्जमा हैजा: १७ जना अझै आसियुमै

वीरगञ्जमा थप २६ जना गम्भीर प्रकारको झाडापखालाका बिरामी भेटिएका छन्। यो सँगै जिल्लामा भेटिने गम्भीर प्रकारका झाडापखालाका कुल संक्रमितको संख्या ८ सय ५८ जना पुगेको छ।

स्वास्थ्य कार्यालय पर्साका अनुसार आज बिहान सम्मको विवरण ८ सय ५८ जना मध्ये १७ जना आईसीयू र ३ जना एचडीयूमा छन्। अहिलेसम्म ७ सय ५१ जना भने अस्पतालबाट डिस्चार्ज भएका छन् भने १ सय ७ जना उपचारत छन्। गत २८ साउन देखि फाटफुट रुपमा झाडापखालाका बिरामी देखा परे पनि गत साता देखि प्रकोपको रुप लिएको थियो। परीक्षणका क्रममा उनीहरूमा हैजा भएको पुष्टि भएको थियो। झाडापखलाबाट दुई जनाको मृत्यु भएको भनिए पनि हैजाबाट मृत्यु भएको पुष्टि भएको छैन।

यस्तै आरडिटी र कल्चर दुवै परीक्षणमा हैजा नै पुष्टि हुने बिरामीको संख्या एक सय ७३ पुगेको छ। यी मध्ये हाल ४१ जना अस्पतालमा भर्ना भएर उपचार गरेका छन भने बाँकी एक सय ३२ जना डिस्चार्ज भइसकेका छन्। केही दिनसम्म पर्साको वीरगञ्ज महानगरपालिका भित्र देखिएको यो केश अहिले छिमेकी जिल्लाहरूमा पनि देखिन थालेको छ। हैजा नियन्त्रणका लागि संघीय, प्रदेश र स्थानीय तहका सरकारहरूले मिलेर काम गरेका छन्। विश्व स्वास्थ्य संगठनले प्राविधिक तथा औषधी उपचारका लागि सहयोग गर्दै आइरहेको छ।

दुई हप्ता भन्दा बढी समयदेखि वीरगन्जमा फैलिएको हैजाको स्रोत अझै पत्ता लागेको छैन। उस्तै खालका लक्षणहरू देखिने हुँदा धेरै मानिस हैजा र झाडापखालाबाट झुक्किने गरेको पाइन्छ। तर हैजाको जीवाणु शरीरमा प्रवेश गरेपछि मानिसहरूलाई निरन्तर दिसा लाग्छ। दिसाबाट चामलको चौलानी जस्तो तरल पदार्थ मानिसको शरीरबाट निरन्तर बगिरहन्छ। त्यसो हुँदा बिरामीको शरीरलाई आवश्यक तत्त्व पनि शरीरबाट बाहिरिन्छन्। शरीरलाई आवश्यक पर्ने तत्व न्यून हुँदै जान्छ।

पटकपटक बान्ता आउने, पेट वा खुट्टाका मांसपेशी बाउँडिने जस्ता समस्या अधिकांश बिरामीमा देखिने उनले उनको भनाइ छ। तरल पदार्थ धेरै खेर जाने भएकाले बिरामीलाई धेरै तिर्खा लाग्ने उनले बताए। बिरामी धेरै थाक्ने र धेरै खटपट हुने उनको भनाइ छ। केही मानिसमा हैजाको लक्षण नदेखिए पनि सङ्क्रमण भएको हुनसक्छ र उनीहरूको दिसामार्फत लगातार केही दिनसम्म हैजाको जीवाणु बाहिर निस्कन्छ। अधिक कमजोरीका कारण केही मानिसहरू बेहोस नै हुनसक्ने चिकित्सकहरूले बताउने गरेका छन्।

स्वास्थ्यमा देखिने जटिलताको हिसाबले पानीजन्य संक्रमणबाट हुने हैजा संक्रमणको एउटै केशलाई पनि जनस्वास्थ्यको हिसाबले महामारी सरह मानिन्छ।