प्रेम र महिला संवेदनाको सशक्त प्रस्तुति ‘कुमारी’ : समीक्षकबाट ४ स्टार

नमस्ते चितवन

सोमबार, माघ २६, २०८२ मा प्रकाशित

काठमाडौं , माघ २६
दिनेश राउत निर्देशित हाल प्रदर्शनरत नेपाली चलचित्र ‘कुमारी’ ले समीक्षक र दर्शक दुवैबाट उत्कृष्ट प्रतिक्रिया पाइरहेको छ। विशेषतः चलचित्र समीक्षकहरूले यसको प्रेम कथा, मौलिक कथावस्तु र सांस्कृतिक प्रस्तुतीको खुलेर प्रशंसा गर्दै चार स्टारसम्मको रेटिङ दिएका छन्।

प्रेम कथा र महिला संवेदनालाई केन्द्रमा राखेर निर्माण गरिएको यस चलचित्रलाई समीक्षकहरूले “धमाकेदार” तथा “लामो समयपछि आएको उत्कृष्ट नेपाली चलचित्र” का रूपमा व्याख्या गरेका छन्। समीक्षामा चलचित्रको पटकथा, निर्देशन र प्रस्तुतिको उच्च प्रशंसा गरिएको छ। एक समीक्षकले लेखेका छन्, “यो चलचित्र विशेष गरी छोरीहरूले हेर्नै पर्ने खालको छ। केही पुरुष दर्शकहरूले कथाको गहिराइ तुरुन्तै नबुझे पनि महिला दर्शकका लागि यो चलचित्र अत्यन्तै मर्मस्पर्शी र अर्थपूर्ण छ।”

चलचित्रले सामाजिक संस्कार, परम्परा र संस्कृतिलाई पर्दामा सुन्दर र कलात्मक ढङ्गले प्रस्तुत गरेको पक्ष पनि समीक्षकहरूले मन पराएका छन्। समीक्षकहरूका अनुसार चलचित्रको सबैभन्दा सबल पक्ष यसको कथा वाचन शैली हो, जसले महिलाको कुमारीत्वसँग जोडिएका पारिवारिक, सामाजिक र मनोवैज्ञानिक पाटोलाई गहिराइमा उजागर गरेको छ।

समीक्षकहरूले चलचित्रको सस्पेन्स र भावनात्मक पक्षले दर्शकलाई अन्तिमसम्म बाँधिराख्न सफल भएको बताएका छन्। प्राविधिक पक्ष र कलाकारहरूको अभिनयको प्रशंसा गर्दै यसलाई चार स्टार योग्य चलचित्रको रूपमा मूल्याङ्कन गरिएको छ। समीक्षकहरूको बुझाइमा ‘कुमारी’ केवल मनोरञ्जनका लागि मात्र होइन, समाजमा गम्भीर विमर्श सुरु गर्ने क्षमता भएको चलचित्र हो। परम्परागत प्रेमकथाभन्दा फरक शैली अपनाउँदै, प्रेम र समाजभित्र अन्तर्निहित महिला संवेदनालाई प्रभावकारी रूपमा प्रस्तुत गरिएको छ।

चलचित्रमा अभिषेक खड्का, आकृति राजभण्डारी, मधु खड्का लगायत कलाकारहरूको सशक्त अभिनयले कथालाई जीवन्त बनाएको छ। युवा पुस्ताको रुचि र अपेक्षालाई सम्बोधन गर्न सफल भएकाले हलमा युवा दर्शकहरूको उल्लेख्य उपस्थिति देखिएको छ।

समग्रमा, मौलिक नेपालीपन, सशक्त अभिनय र बलियो पटकथाको खोजीमा रहेका दर्शकका लागि ‘कुमारी’ एक ‘मस्ट वाच’ नेपाली चलचित्र बनेको निष्कर्ष समीक्षकहरूले निकालेका छन्।