संघर्षको कथा बोकेको आइ एम जीत बहादुर असार ५ मा रिलिज

नमस्ते चितवन

सोमबार, बैशाख १४, २०८३ मा प्रकाशित

काठमाडौं, बैशाख १४
अभिनेता जितु नेपालद्वारा निर्माण गरिएको चलचित्र आइ एम जीत बहादुरको प्रदर्शन मिति तय गरिएको छ। निर्माण टिमले फर्स्ट लुक पोस्टर सार्वजनिक गर्दै फिल्म आगामी असार ५ गतेदेखि देशभर प्रदर्शनमा आउने जानकारी दिएको हो।

यसअघि सार्वजनिक गरिएको टिजरले युट्युबमा दर्शकबाट उत्साहजनक प्रतिक्रिया पाएको थियो, जसले फिल्मप्रति प्रारम्भिक अपेक्षा बढाएको देखिन्छ।

भारतीय बंगाली निर्देशक सुभेन्दु घोषको निर्देशनमा तयार भएको फिल्मले गाउँबाट शहर आएर कलाकार बन्न संघर्ष गर्ने एक युवाको कथा प्रस्तुत गर्छ। फिल्ममा जितु नेपाल मुख्य भूमिकामा छन् भने उनकी जोडीका रूपमा वर्षा राउत देखिएकी छन्।

फिल्ममा प्रियंका कार्की, सन्दीप क्षेत्री र देशभक्त खनाललगायत कलाकारहरूको पनि अभिनय रहेको छ। कलाकारहरूको विविध संयोजनले फिल्मलाई थप आकर्षक बनाउने अपेक्षा निर्माण टिमले गरेको छ।

कर्मभूमि क्रिएशनको ब्यानरमा निर्माण भएको यस चलचित्रका कार्यकारी निर्माता निश्चल कुँवर र निरज नेपाल रहेका छन् भने राजन सिंखडा र दीपेन्द्र अधिकारी सह–निर्माताको रूपमा जोडिएका छन्। भारतीय सिनेमाटोग्राफर अरविन्दले छायांकन गरेको फिल्मको पोस्ट–प्रोडक्सन कार्य भारतमै सम्पन्न गरिएको निर्माण पक्षले जनाएको छ।

निर्देशक सुभेन्दु घोषकै कथा तथा निर्देशनमा बनेको ‘आइ एम जीत बहादुर’को वितरण आरआर फिल्म्सले गर्नेछ भने यसको डिजिटल अधिकार ओएसआर डिजिटलले खरिद गरेको छ।

तीन दशकभन्दा लामो कलाकारिता यात्रामा सक्रिय रहँदै आएका जितु नेपालले यस फिल्ममार्फत निर्माण क्षेत्रमा समेत आफ्नो उपस्थिति बलियो बनाउने अपेक्षा गरिएको छ।