९ करोड क्लबमा ‘लालीबजार’, वर्षकै सर्वाधिक कमाउने नेपाली फिल्म

नमस्ते चितवन

मङ्गलबार, जेठ २६, २०८३ मा प्रकाशित

काठमाडौं । गत वैशाख २५ गतेदेखि प्रदर्शनमा आएको नेपाली फिल्म ‘लालीबजार’ घरेलु बक्स अफिसमा ब्लकबस्टर सावित भएको छ। फिल्मले ९ करोड रुपैयाँभन्दा बढी कमाइ गर्दै आर्थिक वर्ष २०८३ मा हालसम्म प्रदर्शन भएका नेपाली चलचित्रमध्ये सर्वाधिक कमाइ गर्ने फिल्मको कीर्तिमान बनाएको छ।

चलचित्र विकास बोर्डअन्तर्गतको ‘सिनेपा@बक्सअफिस’ले सार्वजनिक गरेको तथ्यांकअनुसार जेठ २४ गतेसम्म फिल्मले ८ करोड ७८ लाख ५ हजार १९८ रुपैयाँ ग्रस कलेक्सन गरेको छ। सो अवधिसम्म २ लाख ९८ हजार २२७ टिकट बिक्री भएका छन्। बोर्डले सार्वजनिक गरेको तथ्यांक आइतबारसम्मको भएकाले त्यसयताको व्यापार जोड्दा फिल्मको कमाइ ९ करोड रुपैयाँ नाघिसकेको छ।

अभिनेत्री स्वस्तिमा खड्काको मुख्य भूमिका रहेको फिल्ममा रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, विशाल देवकोटा र प्रशंसा सुवेदीलगायत कलाकारको अभिनय रहेको छ।

फिल्ममार्फत ठूलो पर्दामा डेब्यु गरेका विशाल देवकोटा र प्रशंसा सुवेदीले दर्शकबाट सकारात्मक प्रतिक्रिया बटुलिरहेका छन्। करिब नौ वर्ष रंगमञ्चमा सक्रिय रहेका विशालका लागि पहिलो फिल्म नै व्यावसायिक रूपमा सफल बनेको छ। फिल्ममा उनले निर्वाह गरेको ‘नारायण’ पात्रले शिक्षाको महत्त्वलाई उजागर गर्ने भएकाले दर्शकको विशेष प्रशंसा पाएको छ।

षट्कोण आर्ट्सको ब्यानरमा निर्माण भएको ‘लालीबजार’को निर्देशन यम थापाले गरेका हुन्। फिल्ममा प्रदीप भट्टराई कार्यकारी निर्माता तथा पटकथाकारका रूपमा रहेका छन् भने म्याक्स दीपेश खत्री निर्माता हुन्। सुशन प्रजापतिको छायांकन र मित्रदेव गुरुङको सम्पादन रहेको फिल्मले प्रदर्शनको पाँचौँ सातासम्म पनि दर्शकको राम्रो साथ पाइरहेको छ।