१० खेलाडीमा सीमित बेल्जियमलाई इरानले रोक्यो, गोलरहित बराबरी

नमस्ते चितवन

सोमबार, असार ०८, २०८३ मा प्रकाशित

काठमाडौं । फिफा विश्वकपअन्तर्गत समूह ‘जी’ को खेलमा बेल्जियम र इरानले गोलरहित बराबरी खेल्दै अंक बाँडेका छन्। लस एन्जलसमा सम्पन्न खेलमा दुवै टोलीले अवसर सिर्जना गरे पनि गोल गर्न नसक्दा खेल ०–० मा टुंगिएको हो।

बराबरीसँगै बेल्जियम र इरानले दुई खेलबाट समान दुई–दुई अंक जोडेका छन्। दुवै टोलीको नकआउट चरण यात्रा अब अन्तिम खेलको नतिजामा निर्भर रहने भएको छ।

खेलमा बेल्जियमले बलमाथि बढी नियन्त्रण राखे पनि इरानको अनुशासित रक्षापंक्तिलाई भेद्न सकेन। रोमेलु लुकाकु सुरुआती रोजाइमा रहेका खेलमा बेल्जियमले केही राम्रा अवसर बनाएको थियो। युरी टिलेमान्सको प्रारम्भिक प्रहारलाई इरानी गोलकिपर अलिरोजा बेइरानभान्डले उत्कृष्ट बचाउ गरेका थिए।

दोस्रो हाफमा पनि बेइरानभान्डले माक्सिम डे क्युपरका लगातार खतरनाक प्रहार रोक्दै इरानलाई खेलमा कायम राखे। अर्कोतर्फ, इरानले काउन्टर अट्याकमार्फत बेल्जियमलाई दबाबमा राख्ने प्रयास गर्यो।

२५औँ मिनेटमा मेहदी तारेमीले फ्रिकिकमार्फत गोल गरे पनि भिडियो असिस्टेन्ट रेफ्री (VAR) ले अफसाइड ठहर गरेपछि त्यो गोलले मान्यता पाएन।

खेलको ६६औँ मिनेटमा बेल्जियम १० खेलाडीमा सीमित भयो। नाथन न्गोयले तारेमीलाई फल गरेपछि रेफ्रीले उनलाई सिधै रातो कार्ड देखाएका थिए। त्यसपछि इरानले संख्यात्मक फाइदा पाए पनि त्यसलाई गोलमा परिणत गर्न सकेन।

थिबाउट कोर्टुवा र अलिरोजा बेइरानभान्ड दुवै गोलकिपरको उत्कृष्ट प्रदर्शनका कारण खेल गोलरहित बराबरीमा सकिएको हो। अब समूह चरणको अन्तिम खेलले दुवै टोलीको भविष्य तय गर्नेछ।

सोमबार, असार ०८, २०८३ मा प्रकाशित