काठमाडौं, आषाढ ०९
आगामी असोज ३० गतेदेखि प्रदर्शनमा आउने तयारीमा रहेको बहुप्रतिक्षित नेपाली चलचित्र ‘आ बाट आमा २’ ले प्रदर्शनअघि नै अन्तर्राष्ट्रिय बजारमा राम्रो व्यापार गर्न थालेको छ। चलचित्रको हङकङ प्रदर्शन अधिकार आधिकारिक रूपमा बिक्री भएको निर्माण पक्षले जनाएको छ।
निर्माण टिमका अनुसार हङकङमा चलचित्र प्रदर्शनको अधिकार श्री स्वर्णिम कम्युनिकेसन प्रालिले खरिद गरेको हो। चलचित्रको छायांकन पूर्ण रूपमा नसकिँदै विदेशी बजारबाट आएको सकारात्मक प्रतिक्रिया र व्यापारिक सम्झौताले निर्माण पक्षलाई थप उत्साहित बनाएको छ।
निर्देशक चन्द्र पन्तले हङकङ प्रदर्शन अधिकार आकर्षक मूल्यमा बिक्री भएको जानकारी दिँदै सम्झौतासम्बन्धी आर्थिक विवरण भने हाल सार्वजनिक नगर्ने बताए। उनका अनुसार समयअनुसार थप विवरण सार्वजनिक गरिनेछ।
गत वर्ष प्रदर्शन भएर दर्शकबाट राम्रो प्रतिक्रिया पाएको ‘आ बाट आमा’ को सफलतापछि यसको सिक्वेलप्रति स्वदेशसँगै विदेशमा पनि उत्साह देखिएको छ। यही कारण चलचित्र प्रदर्शनअघि नै विभिन्न देशका वितरकहरूले चासो देखाइरहेका छन्।
यसअघि चलचित्रको जापान प्रदर्शन अधिकार आर एन्ड बी इन्टरटेनमेन्टले खरिद गरिसकेको छ भने अमेरिका र क्यानडाको वितरण अधिकार डोको फिल्म्सले आफ्नो पक्षमा पारिसकेको छ। प्रमुख अन्तर्राष्ट्रिय बजारमा लगातार अधिकार बिक्री हुनु चलचित्रप्रतिको विश्वास र अपेक्षाको संकेत मानिएको छ।
आर्या इन्टरटेनमेन्ट प्रालिको ब्यानरमा निर्माण भइरहेको चलचित्रमा पल शाह, मलिका महत, आकाश श्रेष्ठ, रिस्ता गुरुङ, निकिता आचार्य, सबिन श्रेष्ठ, विपना थापा, प्रदीप रावत, साइग्रेस पोखरेल, गजित विष्ट, नरेन खड्का र दिलीप अखेडाको अभिनय रहनेछ।
निर्देशक चन्द्र पन्तकै कथा, पटकथा तथा निर्देशन रहेको चलचित्रको निर्माण व्यवस्थापन करणसिंह रसालीले सम्हालिरहेका छन्।
‘दशैंको जमरा र आमाको पर्खाइको कथा’ भन्ने मूल भावमा आधारित चलचित्रले वैदेशिक रोजगारी र परिस्थितिका कारण टाढिएका आमा–सन्तानबीचको भावनात्मक सम्बन्ध, पीडा र प्रतिक्षाको कथा प्रस्तुत गर्नेछ।
नेपालभित्र चलचित्रको वितरण आरआर फिल्म्सले गर्नेछ भने डिजिटल प्रदर्शन अधिकार ओएसआर डिजिटलसँग रहेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.