‘पार्वती’को ‘नौतुना रेलैमा’मा टिकटक बनाएर जित्नुहोस् ५० हजार रुपैयाँ

काठमाडौं । अभिनेत्री नीता ढुङ्गानाको निर्देशनमा बनेको बहुप्रतीक्षित नेपाली फिल्म ‘पार्वती’ले दर्शकलाई लक्षित गर्दै विशेष टिकटक प्रतियोगिता घोषणा गरेको छ। फिल्मको चर्चित रत्यौली गीत ‘नौतुना रेलैमा’मा भिडियो बनाएर सहभागी हुनेहरूले आकर्षक नगद पुरस्कार जित्ने अवसर पाउने भएका छन्।

निर्माण कम्पनी नीता फिल्म्सका अनुसार प्रतियोगितामा सहभागी हुन इच्छुकले ‘नौतुना रेलैमा’ गीतमा सिर्जनात्मक टिकटक भिडियो तयार गरी आफ्नो टिकटक खातामा पोस्ट गर्नुपर्नेछ। भिडियो पोस्ट गर्दा #पार्वती, #भाद्र१२ र #नौतुनारेलैमा ह्यासट्याग अनिवार्य रूपमा प्रयोग गर्नुपर्नेछ।

प्रतियोगिताका विजेतामध्ये प्रथम हुनेले ५० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले २० हजार रुपैयाँ नगद पुरस्कार प्राप्त गर्नेछन्। यसबाहेक उत्कृष्ट पाँच जना सहभागीलाई फिल्म हेर्न निःशुल्क टिकट प्रदान गरिनेछ। निर्माण पक्षका अनुसार भिडियोको सिर्जनशीलता र प्राप्त भ्युजका आधारमा विजेता छनोट गरिनेछ।

हालै सार्वजनिक भएको ‘नौतुना रेलैमा’ गीतले छोटो समयमै दर्शकमाझ राम्रो चर्चा बटुलिरहेको छ। विवाह समारोहमा खेलिने परम्परागत रत्यौलीलाई आधुनिक शैलीमा प्रस्तुत गरिएको गीतको भिडियोमा नीता ढुङ्गाना, दीपाश्री निरौला, अञ्जली अधिकारी, सिरु विष्ट, बसुन्धरा भुसाल, आशा पौडेल, अशोक दर्जी र क्रिमसन श्रेष्ठको आकर्षक नृत्य देख्न सकिन्छ।

विशेषगरी, भिडियोमा दीपाश्री निरौला पुरुषको भेषमा प्रस्तुत भएकी छन् भने नीता ढुङ्गाना परम्परागत महिलाको पहिरनमा देखिएकी छन्। उनीहरूको रमाइलो अभिनय र नृत्यले गीतलाई अझ मनोरञ्जनात्मक बनाएको छ।

फिल्म ‘पार्वती’को कथा, पटकथा र निर्देशन नीता ढुङ्गानाले नै गरेकी हुन् भने स्क्रिनप्ले शिवम् अधिकारीले लेखेका छन्। चलचित्रमा दीपाश्री निरौला, अशोक दर्जी, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारहरूको अभिनय रहेको छ।

फिल्मको छायांकन सुदीप बरालले गरेका हुन् भने नृत्य निर्देशन रामजी लामिछानेको रहेको छ। शंकर पाण्डे कार्यकारी निर्माता तथा प्रोडक्सन म्यानेजर रहेका छन् भने हरिहर अधिकारी निर्माता हुन्।

यसैगरी, फिल्मको सम्पादन तथा टिजर–ट्रेलर साहिल खानले तयार पारेका छन्। पोस्टर डिजाइन रोयल भीमसेनले गरेका हुन् भने वितरणको जिम्मेवारी एफडी कम्पनी, एप्पल इन्टरटेनमेन्ट र रिच इन्टरटेनमेन्टले लिएका छन्। फिल्मको डिजिटल अधिकार ओएसआरसँग रहेको छ।

आगामी भदौ १२ गतेदेखि देशभर प्रदर्शनमा आउने तयारीमा रहेको ‘पार्वती’ले टिकटक प्रतियोगितामार्फत दर्शकसँग प्रत्यक्ष जोडिने प्रयास गरेको निर्माण पक्षको विश्वास छ।

आइतबार, असार १४, २०८३ मा प्रकाशित