फागुन २१ मा रिलिज हुँदै पूजा शर्मा र विजय बरालको ‘रत्यौली’

नमस्ते चितवन

सोमबार, असार १५, २०८३ मा प्रकाशित

काठमाडौं । अभिनेत्री पूजा शर्माको प्रस्तुतिमा निर्माण हुन लागेको नेपाली चलचित्र ‘रत्यौली’को प्रदर्शन मिति घोषणा गरिएको छ। निर्माण टिमले चलचित्र आगामी फागुन २१ गतेदेखि नेपालसहित विश्वभर एकसाथ प्रदर्शनमा ल्याउने जानकारी दिएको हो।

मुस्कान ढकालको निर्देशनमा बन्ने चलचित्रका निर्माता सुरज आचार्य हुन्। नाइटिङ्गेल इन्टरटेनमेन्ट प्रालि र पूजा शर्मा प्रोडक्सनको ब्यानरमा निर्माण हुन लागेको यस चलचित्रमा अभिनेता विजय बराल र अभिनेत्री पूजा शर्मा मुख्य भूमिकामा देखिनेछन्।

चलचित्रको पहिलो पोस्टर सार्वजनिक भइसकेको छ, जसले सामाजिक सञ्जालमा सकारात्मक प्रतिक्रिया पाएको थियो। अहिले निर्माण टिम चलचित्रको प्रि–प्रोडक्सन कार्यलाई तीव्र गतिमा अघि बढाइरहेको छ भने छायांकन भदौ महिनादेखि सुरु गर्ने तयारी गरिएको छ।

चलचित्रको वितरण अधिकार रिच इन्टरटेनमेन्टले प्राप्त गरेको छ। वितरक करण श्रेष्ठका अनुसार महाशिवरात्रि र अन्तर्राष्ट्रिय नारी दिवसको अवसरलाई मध्यनजर गर्दै फागुन २१ लाई प्रदर्शन मिति तय गरिएको हो।

सामाजिक कथावस्तुमा आधारित ‘रत्यौली’ले नेपाली समाज, संस्कृति, परम्परा र सम्बन्धका विविध आयामलाई मनोरञ्जनात्मक शैलीमा प्रस्तुत गर्ने निर्माण टिमको विश्वास छ।