काठमाडौं । आगामी भदौ १९ गतेदेखि प्रदर्शनमा आउने नेपाली चलचित्र ‘बाः एक योद्धा’को नयाँ पोस्टर सार्वजनिक गरिएको छ। निर्माण टिमले सोमबार एकैसाथ दुईवटा आधिकारिक पोस्टर सार्वजनिक गर्दै चलचित्रको प्रचारलाई थप तीव्र बनाएको हो।
सार्वजनिक पोस्टरहरूले चलचित्र पूर्ण रूपमा पारिवारिक कथामा आधारित रहेको संकेत गरेका छन्। पहिलो पोस्टरमा दिव्यदेव पन्त, झरना थापा, सुहाना थापा, सागर खनाल र सुप्रज्ञा शर्मालाई एउटै परिवारका सदस्यका रूपमा प्रस्तुत गरिएको छ।
घरको आँगनमा हाँस्दै सामूहिक तस्बिर खिचाइरहेको दृश्यले खुसी परिवारको झल्को दिन्छ। रातो माटोले लिपिएको घर, पारम्परिक परिवेश र साथमा देखिएको कुकुरले नेपाली गाउँघर तथा दसैँको माहोललाई जीवन्त बनाएको छ। पात्रहरूको पहिरन र प्रस्तुतीकरणले उनीहरू मध्यमवर्गीय परिवारका सदस्य रहेको संकेत गर्छ।
दोस्रो पोस्टरमा भने पहिलो पोस्टरको खुसी वातावरणभन्दा बिल्कुल फरक भाव प्रस्तुत गरिएको छ। झरना थापा र सुहाना थापाको अनुहारमा चिन्ता र कौतुहलता देखिन्छ भने दिव्यदेव पन्त र अनिल बुढाथोकीको अभिव्यक्तिमा आक्रोश झल्किएको छ। माओत्से गुरुङको रहस्यमय मुस्कानले भने उनको भूमिकाप्रति थप उत्सुकता जगाएको छ।
दुवै पोस्टरले एउटा सुखी परिवारमा अचानक आउने अप्रत्याशित घटनापछि उत्पन्न हुने संघर्ष, सम्बन्धका उतारचढाव र त्यसको समाधानको यात्रालाई केन्द्रमा राखिएको कथाको संकेत गर्छ।
निर्देशक हरि लम्सालका अनुसार चलचित्रको मुख्य विषय नेपाली समाजमा सन्तानको भविष्यका लागि एक बुवाले गर्ने त्याग, संघर्ष र जीवनभर सामना गर्ने चुनौती हो।
चलचित्रमा झरना थापा, सुहाना थापा, दिव्यदेव पन्त, सागर खनाल, शिशिर शिवाकोटी, सुप्रज्ञा शर्मा, शवि थापा र अनिल बुढाथोकीको मुख्य भूमिका रहेको छ।
आर्टिस्टिक इन्टरटेनमेन्टको ब्यानरमा निर्माण भएको चलचित्रको लेखन तथा कथा निर्देशक हरि लम्साल स्वयंले तयार गरेका हुन्। निर्माता वसन्त लम्साल हुन्, जसले यसअघि अभिनेता विपिन कार्की अभिनीत चलचित्र ‘कर्मा’ निर्माण गरेका थिए।
शिवराम श्रेष्ठको छायांकन रहेको चलचित्रको मुख्य सहायक निर्देशक तारानाथ न्यौपाने हुन्। ‘बाः एक योद्धा’लाई कुवेर सिने डिस्ट्रिब्युसनमार्फत आशिष एच तामाङ र प्रदीप धामीले वितरण गर्नेछन्।
चलचित्र भदौ १९ गते, अर्थात् कुशे औँसी (बुबाको मुख हेर्ने दिन)को पूर्वसन्ध्यादेखि देशभर प्रदर्शनमा आउनेछ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.