छाउपडीको पीडा बोकेको ‘हली’ले विशेष शोमै जित्यो दर्शकको मन

नमस्ते चितवन

आइतबार, साउन १०, २०८३ मा प्रकाशित

काठमाडौँ । आगामी साउन २२ गतेदेखि देशभर प्रदर्शनमा आउन लागेको नेपाली चलचित्र ‘हली’ को काठमाडौँस्थित सिटी सेन्टरको बिग मुभिजमा विशेष प्रदर्शन सम्पन्न भएको छ। हल भरिभराउ दर्शकको उपस्थितिमा सम्पन्न शोपछि चलचित्रले दर्शक तथा चलचित्रकर्मीबाट अत्यन्तै सकारात्मक प्रतिक्रिया प्राप्त गरेको छ।

विशेष प्रदर्शनपछि अधिकांश दर्शक र फिल्मकर्मीले छाउपडी प्रथाजस्तो गम्भीर सामाजिक विषयलाई सशक्त ढंगले प्रस्तुत गरिएको भन्दै चलचित्रको खुलेर प्रशंसा गरेका छन्। सकारात्मक प्रतिक्रियाले निर्देशक ओम प्रतीक तथा निर्माताद्वय पूजा गुरुङ र जश्मिन श्रेष्ठलाई थप उत्साहित बनाएको छ।

छाउपडी प्रथाका कारण बालिकाहरूले भोग्नुपरेका पीडा, विभेद र दुर्व्यवहारलाई केन्द्रमा राखेर निर्माण गरिएको चलचित्रले सामाजिक परिवर्तनको सशक्त सन्देश बोकेको छ। निर्देशक ओम प्रतीक स्वयंले लेखेको कथामा “देश र समाज परिवर्तनका लागि एक जना ‘हली’ नै पर्याप्त हुन्छ” भन्ने भाव प्रस्तुत गरिएको छ।

जापुरा फिल्म्स प्रोडक्सन र शुभ चिरायु फिल्म्सको संयुक्त निर्माण रहेको चलचित्रका कार्यकारी निर्माता अर्जुन भुसाल, सह–निर्मात्री नम्रता भण्डारी, लाइन प्रोड्युसर लक्ष्मण कर्माचार्य तथा मुख्य सहायक निर्देशक जीवननाथ गौतम हुन्।

चलचित्रमा प्रमोद दीप, सुजता थापा, सरोज खनाल, अरुणा कार्की, अर्जुन गुरुङ, विद्या कार्की, नवीन श्रेष्ठ, कञ्चन दुलाल, कमल गाउँले, विशाल पहाडी तथा निर्देशक ओम प्रतीक स्वयंको मुख्य अभिनय रहेको छ। विशेष आकर्षणका रूपमा रहेको प्रमोशनल गीतमा दीपाश्री निरौला, किरण केसी, दिलीप रायमाझी, प्रियंका कार्की र पूजा शर्माको विशेष नृत्यसमेत समावेश गरिएको छ।

राहुल राईको छायांकन, रामप्रसाद चौधरी र विपिन मल्लको सम्पादन तथा कुमार महर्जनको द्वन्द्व निर्देशन रहेको चलचित्रमा शम्भुजित बास्कोटा, बाबुल गिरी र कृष्ण भारद्वाजको संगीत रहेको छ। निर्माता जश्मिन श्रेष्ठको शब्द, बाबुल गिरीको संगीत तथा बाबुल गिरी र शान्ति श्री परियारको स्वर रहेको गीतले चलचित्रलाई थप आकर्षक बनाएको छ। गीतको कोरियोग्राफी ओम प्रतीक र कविराज गहतराजले संयुक्त रूपमा गरेका हुन्। चलचित्रको वितरण नेशनल सिने ग्रुप प्रालिले गर्नेछ भने यसको डिजिटल पार्टनर ओएसआर डिजिटल रहेको छ।