काठमाडौं । आइसीसी क्रिकेट विश्वकप लिग–२ अन्तर्गत त्रिदेशीय एकदिवसीय शृंखलामा नेपालले सोमबार नामिबियासँग रोमाञ्चक प्रतिस्पर्धामा ३ रनको हार बेहोरेको छ। नेदरल्यान्ड्सको उट्रेच्टमा भएको खेलमा अन्तिम बलसम्म संघर्ष गरे पनि नेपाल लक्ष्य भेट्टाउन असफल रह्यो।
टस हारेर पहिले ब्याटिङ गरेको नामिबियाले निर्धारित ५० ओभरमा ७ विकेट गुमाउँदै २११ रन बनायो। जवाफमा नेपालले ६ विकेटको क्षतिमा २०८ रन मात्र जोड्न सक्यो। अन्तिम बलमा जितका लागि ५ रन आवश्यक भए पनि गुल्सन झाले एक रन मात्र जोड्न सकेपछि नेपाल ३ रनले पराजित भयो।
यो हारसँगै नेपालले प्रतियोगितामा लगातार तेस्रो हार व्यहोरेको छ। यसअघि नेपाल नामिबियासँग ८ विकेट र नेदरल्यान्ड्ससँग पनि पराजित भएको थियो। लगातारको हारपछि विश्वकप एकदिवसीय छनोटमा सिधै स्थान बनाउने नेपालको सम्भावना झन् कमजोर बनेको छ।
हाल नेपाल ३१ खेलबाट २४ अंकसहित अंकतालिकाको छैटौं स्थानमा झरेको छ। नामिबिया समान ३१ खेलबाट २६ अंक जोड्दै पाँचौं स्थानमा उक्लिएको छ। नेदरल्यान्ड्स ३० खेलबाट ३६ अंकसहित तेस्रो स्थानमा छ भने अमेरिका ४३ अंकसहित शीर्ष स्थानमा र स्कटल्यान्ड ३८ अंकसहित दोस्रो स्थानमा रहेको छ। प्रतियोगिताका शीर्ष चार टोलीले विश्वकप छनोटमा सिधा स्थान बनाउनेछन् भने शीर्ष ६ भित्र रहन सके मात्र एकदिवसीय अन्तर्राष्ट्रिय मान्यता जोगिनेछ।
नेपालका लागि आसिफ शेखले सर्वाधिक ४५ रन बनाए। उनले ८९ बलमा ४ चौका प्रहार गर्दै कुशल भुर्तेलसँग पहिलो विकेटका लागि ५१ रनको साझेदारी गरेका थिए। भुर्तेलले ३४ रन जोडे।
कप्तान रोहित पौडेलले ४१ रनको उपयोगी इनिङ्स खेले पनि टोलीलाई जितसम्म पुर्याउन सकेनन्। आरिफ शेख ३८ रनमा अविजित रहे भने गुल्सन झाले अन्तिम समयमा १० बलमा अविजित १९ रन बनाए। इशान पाण्डे १४, भीम सार्की १ र दीपेन्द्रसिंह ऐरी ३ रनमा आउट भए।
नामिबियाका लागि ज्याक ब्रासेलले ३ विकेट लिए भने रुबेन ट्रम्पलमानले २ विकेट हात पारे।
यसअघि नामिबियाका जान फ्राइलिन्कले उत्कृष्ट शतकीय इनिङ्स खेल्दै टोलीलाई प्रतिस्पर्धात्मक योगफलसम्म पुर्याएका थिए। उनले १४९ बलमा ३ चौकासहित १०० रन बनाए। लरेन स्टिनकाम्पले ५९ रनको अर्धशतक प्रहार गर्दै फ्राइलिन्कसँग तेस्रो विकेटका लागि १३१ रनको साझेदारी गरेका थिए।
नेपालका तीव्र गतिका बलर करण केसीले उत्कृष्ट बलिङ गर्दै ५ विकेट लिए। उनले मालन क्रुगर, लरेन स्टिनकाम्प, जेराड इरास्मस, जेजे स्मिट र जान ग्रिनलाई आउट गर्दै एकदिवसीय अन्तर्राष्ट्रिय क्रिकेटमा १०० विकेट पूरा गर्ने नेपालका दोस्रो बलर बन्ने कीर्तिमान पनि बनाए। हाल उनको ओडीआई विकेट संख्या १०३ पुगेको छ। यसअघि यो उपलब्धि सन्दीप लामिछानेले हासिल गरेका थिए, जसको नाममा १५४ ओडीआई विकेट रहेका छन्।
व्यक्तिगत रूपमा करणले ऐतिहासिक उपलब्धि हासिल गरे पनि टोलीका लागि भने नतिजा निराशाजनक रह्यो।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.