काठमाडौं । नेपाली चलचित्रमा साइकोलोजिकल मिस्ट्री थ्रिलर विधाको नयाँ प्रयोग गर्ने लक्ष्यसहित चलचित्र ‘पञ्चमी’को औपचारिक घोषणा गरिएको छ। निर्माण टिमले रहस्यमय थिम पोस्टर सार्वजनिक गर्दै चलचित्र निर्माणको जानकारी दिएको हो।
‘पञ्चमी’मार्फत लामो समयदेखि पर्दापछाडि रहेर नेपाली सिनेमामा सक्रिय सौगात बस्नेतले निर्देशकका रूपमा डेब्यु गर्न लागेका हुन्। उनले यसअघि दीपेन्द्र के. खनालसहितका निर्देशकसँग प्रमुख सहायक निर्देशक र कार्यकारी निर्माताका रूपमा काम गरिसकेका छन्।
सार्वजनिक गरिएको पोस्टरमा पुरानो टाइपराइटरमा लेखिएको ‘पञ्चमी’ शीर्षक, त्रिशूल, दुई नाग, शीर्षकलाई घेरेका पाँचवटा वृत्त, नाग अंकित रहस्यमयी लकेट र माथि रहेको शुक्ल पक्षको अर्धचन्द्र समावेश छन्। निर्देशक बस्नेतका अनुसार पोस्टरमा रहेका यी सबै प्रतीक चलचित्रका पात्र र कथासँग प्रत्यक्ष रूपमा जोडिएका छन्, जसको अर्थ चलचित्र हेरेपछि मात्र खुल्नेछ।
पोस्टरमा राखिएको ‘I Hate Whoever Comes Late’ भन्ने वाक्यले पनि दर्शकमा थप जिज्ञासा पैदा गरेको छ। यो संवाद कसले, किन र कुन सन्दर्भमा बोलेको हो भन्ने विषय निर्माण टिमले अहिले गोप्य राखेको छ।
निर्देशक बस्नेतले पोस्टरमा देखिएका प्रतीकहरू अहिले केही रहस्यमय लागे पनि चलचित्रको कथासँगै सबै कुरा स्पष्ट हुँदै जाने बताए। उनका अनुसार ‘पञ्चमी’ दर्शकलाई अन्तिमसम्म रहस्यमा बाँधेर राख्ने साइकोलोजिकल मिस्ट्री थ्रिलर हुनेछ।
चलचित्र कुनै मौलिक कथा नभई एक चर्चित उपन्यासमा आधारित रहेको जनाइएको छ। तर, कुन लेखकको कुन कृतिलाई आधार बनाइएको हो भन्ने विषय अहिले सार्वजनिक गरिएको छैन।
निर्माण पक्षले कलाकार, पटकथाकार तथा अन्य प्राविधिक टोलीको नाम पनि हाल गोप्य राखेको छ। ती सबै विवरण क्रमशः सार्वजनिक गरिने र छिट्टै चलचित्रको पहिलो झलक पनि दर्शकमाझ ल्याइने निर्देशक बस्नेतले जानकारी दिएका छन्।
रहस्यमय पोस्टर, फरक विधा र नयाँ निर्देशकको प्रस्तुतीकरणका कारण ‘पञ्चमी’ घोषणा भएसँगै नेपाली चलचित्र वृत्तमा चर्चाको विषय बनेको छ। पोस्टरमा समावेश गरिएका पाँच प्रतीक र शीर्षकबीचको सम्बन्धले दर्शकमाझ चलचित्रप्रति उत्सुकता झन् बढाएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.