आजदेखि प्रदर्शनमा ‘कमला मिस’ र ‘हली’, फरक विषयवस्तुका दुई नेपाली चलचित्रको परीक्षा सुरु

काठमाडौं, साउन २२
फ्राइडे रिलिजअन्तर्गत आज शुक्रबारबाट नेपाली चलचित्र ‘कमला मिस’ र ‘हली’ देशभर प्रदर्शनमा आएका छन्। फरक विषयवस्तु बोकेका यी दुवै चलचित्र प्रदर्शनमा आए पनि हलहरूमा भने अपेक्षाकृत कम शो पाएका छन्।

वरिष्ठ कलाकार तथा निर्देशक नीर शाह निर्देशित ‘कमला मिस’ बालमनोविज्ञानमा आधारित चलचित्र हो। आमाको माया र साथबाट वञ्चित बालकको संवेदनशील कथा प्रस्तुत गरिएको यो चलचित्र साहित्यकार विजय मल्लको चर्चित नाटक ‘कोही किन बर्बाद होस्’बाट प्रेरित छ।

चलचित्रमा निर्देशक निर शाह सँगै रमेश बुढाथोकी, वासना तिमिल्सिना, शिवम् सराफ क्षेत्री, आरभ दाहाल, भावना मगर, कृष्ण मुरारी ढुंगेल, सुशान्त कुमार श्रेष्ठ, जयन्त रेग्मी, सुरेश थापा, राजन केसी, प्रणव सुबेदी (भोला) र सञ्जय खतिवडा लगायतका कलाकारहरूको अभिनय रहेको छ।

विजय मल्ल स्मृति प्रतिष्ठानका लागि विजय मल्ल परिवारले निर्माण गरेको चलचित्रका कार्यकारी निर्मातामा चैतन्य प्रकाश प्रधान, उमेश मल्ल, रमेश बाबु श्रेष्ठ र राम भट्टराई रहेका छन् भने पुष्कर लामा (प्रेम भोम्जन) लाइन प्रोड्युसर हुन्। चलचित्रको कथा विजय मल्लको हो भने पटकथा तथा संवाद नीर शाह, प्रजल दुलाल र सुगम दुलालले संयुक्त रूपमा तयार पारेका हुन्।

चलचित्रमा शिवराम श्रेष्ठ को छायांकन, मिलन विक्रम शाह को सम्पादन, किरण तुलाधर को पृष्ठभूमि संगीत, मुकेश शाह को साउन्ड मास्टरिङ तथा रामजी लामिछाने को कोरियोग्राफी रहेको छ। चलचित्रलाई एप्पल इन्टरटेन्मेन्ट, रिच इन्टरटेन्मेन्ट र एफडी कम्पनी ले देशव्यापी रूपमा वितरण गर्नेछन्।

यस्तै निर्देशक ओम प्रतीकको निर्देशनमा बनेको ‘हली’ले सुदूरपश्चिम र मध्यपश्चिम नेपालमा अझै विद्यमान छाउपडी प्रथा र सामाजिक विभेदको विषयलाई मुख्य कथावस्तु बनाएको छ।

सामाजिक यथार्थमा आधारित चलचित्रमा सरोज खनाल, अरुणा कार्की, प्रमोद दीप, सुजाता थापा, विद्या कार्की, अर्जुन गुरुङ, नवीन श्रेष्ठ, विशाल पहाडीलगायतका कलाकारहरूको अभिनय रहेको छ। निर्देशक ओम प्रतीक स्वयं पनि चलचित्रको मुख्य भूमिकामा देखिएका छन्।

जापुरा फिल्म्स प्रोडक्सन र शुभ चिरायु फिल्म्सको सहकार्यमा निर्माण भएको चलचित्रमा शम्भुजित बास्कोटा, बाबुल गिरी र कृष्ण भारद्वाजको संगीत, राहुल राईको छायांकन, रामप्रसाद चौधरी र विपिन मल्लको सम्पादन तथा कुमार महर्जनको द्वन्द्व निर्देशन रहेको छ। चलचित्रका कार्यकारी निर्माता अर्जुन भुसाल हुन्।

फरक–फरक विषयवस्तु बोकेका ‘हली’ र ‘कमला मिस’ सीमित शोका बीच प्रदर्शनमा आएका छन्। अब दर्शकले यी चलचित्रलाई कस्तो साथ दिन्छन् भन्ने चासो फिल्मवृत्तमा रहेको छ।

शुक्रबार, साउन २२, २०८३ मा प्रकाशित