काठमाडौं । निर्देशक सौरभ चौधरीको नयाँ चलचित्र ‘द राइज अफ साम्राज्य’मा अभिनेता नाजिर हुसेन अनुबन्धित भएका छन्। यसअघि नै सौगात मल्ल र दयाहाङ राईलाई मुख्य भूमिकामा अनुबन्ध गरिसकेको निर्माण टिमले नाजिरलाई पनि चलचित्रमा भित्र्याएको हो।

नाजिर र निर्देशक चौधरीबीच यो दोस्रो सहकार्य हो। यसअघि उनीहरूले चलचित्र **‘अगस्त्य’**मा सँगै काम गरेका थिए। निर्देशक चौधरीले नाजिरलाई चलचित्रको एक महत्वपूर्ण मुख्य भूमिकामा देख्न सकिने बताएका छन्।

“नाजिर आफैँमा भर्सटाइल अभिनेता हुन्। अब्बल कलाकारलाई जोड्ने क्रममा उहाँसँग पनि सहकार्य गरेका हौँ,” चौधरीले भने, “सौगात र दयाहाङजस्तै नाजिर पनि चलचित्रको मुख्य कलाकारका रूपमा देखिनुहुनेछ।”

सौगात, दयाहाङ र नाजिरपछि पनि अन्य चर्चित कलाकार चलचित्रमा जोडिने निर्देशक चौधरीले जानकारी दिएका छन्। कलाकारको बलियो लाइनअपसँगै चलचित्र मल्टिस्टार बन्ने देखिएको छ।

डार्क हर्स इन्टरटेन्मेन्टको ब्यानरमा निर्माण हुने चलचित्रको कथा तथा पटकथा उपन्यासकार बुद्धिसागरले लेखेका छन्। निर्देशक चौधरीका अनुसार चलचित्र एपिक एक्सन ड्रामामा आधारित हुनेछ।

नेपाली सिनेमाकै ठूलो स्केलको एक्सन चलचित्र बनाउने तयारीमा रहेको निर्माण टिमले जनाएको छ। चलचित्रको छायांकन आगामी भदौको पहिलो साताबाट सुरु हुनेछ। ७० दिनको छायांकन तालिकामध्ये अधिकांश दृश्य पूर्वी नेपालमा खिचिनेछ।

प्रवेश चौधरी र निला देव निर्माता रहेको चलचित्रमा विश्वास बस्नेत ‘बेन’ को–प्रोड्युसर तथा शंकर पाण्डे कार्यकारी निर्माता छन्। मानकृष्ण महर्जन डीओपी र श्री श्रेष्ठ एक्सन निर्देशकका रूपमा रहेका छन्।

ओएसआर डिजिटल डिजिटल पार्टनर, टौवा स्टुडियो पब्लिसिटी पार्टनर तथा डीसीएन वितरक रहेको चलचित्रको निर्माण कार्य तीव्र रूपमा अघि बढिरहेको छ।