काठमाडौं । २०८२ सालको सफल चलचित्र ‘ऊनको स्वीटर’को सिक्वेल निर्माण हुने भएको छ। तेस्रो ‘इन्फा इन्टरनेशनल नेपाली फिल्म अवार्ड’को मञ्चबाट शनिबार चलचित्रको औपचारिक घोषणा गरिएको हो।
निर्देशक नवीन चौहानले सिक्वेलको नाम ‘कलेजी–ऊनको स्वीटर’ रहने जानकारी दिएका छन्। चलचित्रको छायांकन आगामी दसैँपछि सुरु गर्ने तयारी छ भने सन् २०२७ मा विश्वव्यापी प्रदर्शन गर्ने लक्ष्य निर्माण पक्षले राखेको छ।
‘ऊनको स्वीटर’को अधुरो प्रेमकथालाई निरन्तरता दिँदै बन्न लागेको सिक्वेलमा अघिल्लो चलचित्रकै लोकप्रिय जोडी विपिन कार्की र मिरुना मगर मुख्य भूमिकामा दोहोरिने भएका छन्। उनीहरू क्रमशः धरणीधर र फूलको भूमिकामा देखिनेछन्। एलेक्स पारस र परीक्षा लिम्बूको पनि चलचित्रमा मुख्य भूमिका रहनेछ।
यसपटक भारतीय रंगमञ्च तथा चलचित्रका चर्चित अभिनेता पियूष मिश्रा पनि ‘कलेजी–ऊनको स्वीटर’मा जोडिएका छन्। लामो समय लगाएर पटकथा अध्ययन गरेपछि र ‘ऊनको स्वीटर’ हेरेपछि मिश्रा चलचित्रमा काम गर्न तयार भएको निर्देशक चौहानले बताएका छन्।
निर्देशक चौहानका अनुसार दर्शकको निरन्तर आग्रह र अधुरो कथा पूरा गर्ने मागलाई सम्बोधन गर्दै सिक्वेल निर्माण गर्न लागिएको हो। धरणीधर र फूलको अधुरो प्रेमकथाको अर्को अध्याय सिक्किमबाट अघि बढ्नेछ।
अभिषेक सुवेदीको सहलेखन तथा नवीन चौहानको लेखन र निर्देशनमा बन्ने चलचित्रमा नेपाल र भारतका कलाकार तथा प्राविधिकको सहभागिता रहनेछ। निर्माण टिमका अन्य सदस्यको घोषणा भने पछि गरिने जनाइएको छ।
प्रेमकथामा आधारित ‘ऊनको स्वीटर’ले नेपालमा करिब १२ करोड रुपैयाँको व्यापार गरेको थियो। भारतमा समेत प्रदर्शन भएको चलचित्रले करिब डेढ करोड भारतीय रुपैयाँ कमाउँदै ५१ दिन मनाएको थियो।
चलचित्रका ‘फूल’, ‘मखमली’, ‘काफ्ले’ र ‘चाईनेजो जिन्दगानी’ लगायतका गीत दर्शकमाझ लोकप्रिय बनेका थिए। ‘ऊनको स्वीटर’ले राष्ट्रिय चलचित्र पुरस्कारसहित विभिन्न अवार्डमा सफलता हात पार्दै हालसम्म १९ वटा पुरस्कार जितिसकेको निर्माण पक्षले जनाएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.