काठमाडौं । निर्देशक प्रवेश पौडेलको निर्देशनमा बन्न लागेको नयाँ नेपाली सिनेमा ‘मायालु’मा अभिनेत्री आकृति बुढाथोकी अनुबन्धित भएकी छन्। निर्देशक पौडेलले सिनेमाको मुख्य भूमिकाका लागि आकृति फाइनल भएको जानकारी दिएका हुन्।
पौडेलले यसअघि ‘अमेरिका बोइज’ र ‘बिहे पास’ निर्देशन गरेका थिए। ‘मायालु’ उनको तेस्रो निर्देशकीय फिचर सिनेमा हुनेछ।
सुरुवाती चरणमा ‘मेरो अधुरो प्रेम’ नाममा घोषणा गरिएको सिनेमाको नाम हाललाई होल्ड गरेर ‘मायालु’ नामबाट निर्माण प्रक्रिया अघि बढाइएको हो। निर्देशक पौडेलका अनुसार ‘मायालु’ निर्माणपछि ‘मेरो अधुरो प्रेम’ नाममा अर्को सिनेमा बनाउने योजना छ।
आकृतिको यो दोस्रो सिनेमा हो। उनले यसअघि अभिनय गरेको ‘मुक्तिपुर’ प्रदर्शनमा आइसकेको छैन। पहिलो सिनेमा प्रदर्शन हुनुअघि नै उनी ‘मायालु’मा आबद्ध भएकी हुन्। नाट्य क्षेत्रबाट अभिनय यात्रा सुरु गरेकी आकृति मोडलिङमा समेत सक्रिय छिन्।
सिनेमाका लागि मुख्य अभिनेत्री फाइनल भएसँगै निर्माण टिम अहिले सहायक अभिनेत्रीको खोजीमा छ। यसअघि नै मुख्य अभिनेताका रूपमा कबीर खड्का अनुबन्धित भइसकेका छन्।
निर्देशक पौडेलका अनुसार ‘मायालु’ त्रिकोणात्मक प्रेमकथामा आधारित हुनेछ। पौडेलकै कथामा बन्ने सिनेमाको पटकथा अनिल कुर्मीले तयार पार्नेछन्।
मुख्य कलाकारबाहेक अन्य पात्रका लागि कलाकारहरू अस्ट्रेलियाबाटै छनोट गरिने निर्देशकले बताएका छन्। सिनेमाको छायांकन नेपाल र अस्ट्रेलियामा हुनेछ भने पहिलो चरणको छायांकन अस्ट्रेलियाबाट सुरु हुनेछ।
कलाकारको भिसा प्रक्रियाका कारण यसअघि तय गरिएको समयमा छायांकन सुरु हुन नसकेको निर्माण पक्षले जनाएको छ। अब दशैंपछि छायांकन सुरु गर्ने तयारी भइरहेको छ। सिनेमाको छायांकन शरद महतोले गर्नेछन्।
सितारा र कबीर खड्का फिल्मस्को ब्यानरमा निर्माण हुने सिनेमामा सुरेन्द्र रावलको लगानी रहनेछ भने विवेक पौडेल सह–निर्माताका रूपमा छन्। शिवाकर प्रसाईं कार्यकारी निर्देशक, सुनिल निउरे मुख्य सहायक निर्देशक र बमबहादुर थापा एसोसिएट निर्देशकका रूपमा जोडिएका छन्।
सिनेमामा अनमोल थापाको संगीत रहनेछ। निर्माण पक्षले दर्शकलाई प्रेम र सम्बन्धको भावनात्मक कथा प्रस्तुत गर्ने तयारी गरेको जनाएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.