कार्यक्रममा सगून ज्वेलर्सका प्रमुख कार्यकारी अधिकृत पियूष सरावगी, मिसेस भोग नेपाल सिजन–२ की विजेता डा. सुमी मल्ल, पर्यटनविद् तथा ठमेल पर्यटन विकास परिषद्का पूर्वउपाध्यक्ष गीता गुरुङ र फेसन उद्यमी श्रीजा श्रेष्ठलगायतको उपस्थिति थियो। उनीहरूले प्रतिक्षाको उपलब्धिको प्रशंसा गर्दै आगामी संस्करणमा अझ उत्कृष्ट सहभागिता हुने अपेक्षा व्यक्त गरे।

‘मिसेस भोग नेपाल सिजन–४’ घोषणा

यसै अवसरमा हाउस अफ फेसन नेपालले विवाहित महिलाको आत्मविश्वास, व्यक्तित्व विकास, नेतृत्व क्षमता र व्यावसायिक सम्भावनालाई उजागर गर्ने उद्देश्यसहित ‘मिसेस भोग नेपाल सिजन–४’को घोषणा गरेको छ।

‘मुकुटभन्दा पर– उपाधिभन्दा ठूलो एउटा यात्रा’ अर्थात् ‘BEYOND THE CROWN – Where a Title Becomes a Journey’ नारासहित आयोजना हुने चौथो संस्करणलाई आयोजकले केवल सौन्दर्य प्रतियोगिताका रूपमा नभई व्यक्तिगत रूपान्तरण, आत्मविश्वास, नेतृत्व विकास, सञ्चार क्षमता र अन्तर्राष्ट्रिय अवसरसँग जोडिएको यात्राका रूपमा अघि बढाउने जनाएको छ।

यस संस्करणको विशेषता भौतिक अडिसन नहुनु हो। नेपालका विभिन्न स्थान तथा विदेशमा रहेका इच्छुक महिलाले समेत सहभागिता जनाउन सक्ने गरी सम्पूर्ण अडिसन प्रक्रिया अनलाइनमार्फत सञ्चालन गरिनेछ। आयोजकले आइतबार साँझदेखि नै सामाजिक सञ्जालमार्फत आवेदन खुला गरेको जनाएको छ।

प्रारम्भिक छनोटमा परेका सहभागीलाई अडिसनअघि आवश्यक काउन्सेलिङ तथा मार्गदर्शन दिइनेछ। छनोट प्रक्रियामा व्यक्तित्व, आत्मविश्वास, सञ्चार क्षमता, प्रस्तुति शैली र समग्र सम्भावनालाई मुख्य आधार बनाइने हाउस अफ फेसन नेपालकी निर्देशक ओशिमा बानुले बताइन्।

छनोट भएका प्रतियोगीलाई व्यावसायिक ग्रुमिङ तथा विभिन्न प्रशिक्षण प्रदान गरिनेछ। प्रशिक्षणमा आत्मविश्वास, सञ्चार क्षमता, स्टेज प्रेजेन्स, व्यक्तित्व विकास तथा आफ्नो मौलिक पहिचान र प्रतिभालाई प्रभावकारी रूपमा प्रस्तुत गर्ने विषयमा विशेष ध्यान दिइने आयोजकले जनाएको छ।

‘BEYOND THE CROWN’ अवधारणामार्फत महिलालाई केवल सौन्दर्य प्रतियोगिताको विजेता नभई समाजमा सकारात्मक भूमिका निर्वाह गर्न सक्ने आत्मविश्वासी र सक्षम नेतृत्वकर्ताका रूपमा विकास गर्ने लक्ष्य राखिएको छ।

आगामी जनवरीमा हुने ग्रान्ड फिनालेका विजेताका लागि पाँच लाख रुपैयाँसम्मको नगद तथा विभिन्न अवसर उपलब्ध गराइने आयोजकले जनाएको छ। विजेतालाई अन्तर्राष्ट्रिय स्तरमा नेपालको प्रतिनिधित्व गर्ने तथा ग्लोबल एक्सपोजर प्राप्त गर्ने अवसरसमेत प्रदान गरिनेछ।

हाउस अफ फेसन नेपालका अनुसार ‘मिसेस भोग नेपाल सिजन–४’ ताज र उपाधिमा मात्र सीमित नरही विवाहित महिलालाई आत्मविश्वास, व्यक्तित्व विकास, नेतृत्व, व्यावसायिक वृद्धि र अन्तर्राष्ट्रिय अवसरतर्फ अघि बढाउने प्लेटफर्मका रूपमा आयोजना गरिनेछ।