‘तिनीहरू : एलिफेन्ट्स इन द फग’ किन्नर समुदायको कथा मात्रै होइन : निर्माता पौडेल

काठमाडौं । भदौ १९ गतेदेखि प्रदर्शनमा आउने तयारीमा रहेको चलचित्र ‘तिनीहरू : एलिफेन्ट्स इन द फग’लाई किन्नर समुदायको कथामा मात्र सीमित गरेर बुझ्न नहुने निर्माण पक्षले स्पष्ट पारेको छ।

चलचित्रको ट्रेलरमा किन्नर समुदायका धेरै पात्र देखिए पनि यसको मूल कथा एउटी आमा र छोरीबीचको सम्बन्ध, प्रेम र संघर्षमा केन्द्रित रहेको निर्माता अनुप पौडेलले बताए।

“यो चलचित्र किन्नर समुदायभित्र रहेका पात्रहरूको कथा हो। तर तेस्रोलिंगी पात्र धेरै भएको फिल्म भनेर मात्रै बुझ्दा यसको कथा र अर्थ साँघुरो हुन्छ,” पौडेलले भने, “केन्द्रमा पिरती छिन्, जो किन्नर समुदायकी महिला हुन्। उनी आफ्नो समुदाय, छोरी र आफूले चाहेको जीवनबीच संघर्ष गरिरहेकी छन्।”

उनका अनुसार चलचित्रले लैंगिक पहिचानसँगै परिवार, मातृत्व, सम्बन्ध र समाजले निर्माण गरेका सीमालाई समेत कथाको महत्वपूर्ण हिस्साका रूपमा प्रस्तुत गरेको छ।

“मूलतः हाम्रो फिल्म एउटी आमा र छोरीको सम्बन्धको कथा हो। एउटी आमाले आफ्नी हराएकी छोरीलाई खोज्न के गर्छिन् र कहाँसम्म पुग्न सक्छिन् भन्ने कथा हो,” पौडेलले भने।

उनले आमाको भावना, प्रेम र संघर्ष कुनै एउटा लैंगिक समुदायमा मात्र सीमित नहुने बताए। किन्नर समुदाय चलचित्रको महत्वपूर्ण हिस्सा भए पनि कथा त्यतिमै सीमित नरहेको उनको भनाइ छ।

अविनाश विक्रम शाहको निर्देशन तथा पटकथा रहेको चलचित्रमा शाह र सन्दीप बादलको कथा छ। कान्सलगायत विभिन्न अन्तर्राष्ट्रिय फिल्म फेस्टिभलमा प्रदर्शन भइसकेको चलचित्रले कान्समा जुरी च्वाइस अवार्डसमेत प्राप्त गरेको छ।

जंगली हात्तीको आतंकबाट प्रभावित बस्तीमा बसोबास गर्ने अल्पसंख्यक समुदायको परिवेशमा आधारित चलचित्रमा गौरी मल्ल, माओत्से गुरुङ, पुष्पा थिङ लामा, दीपिका यादव, जस्मिन विश्वकर्मा, एलिज घिमिरे, महिमा नवबाग र आकांक्षा कार्कीलगायत कलाकारको अभिनय छ।

नेपालसहित फ्रान्स, जर्मनी, ब्राजिल र नर्वेका निर्माण संस्थाको सहकार्यमा चलचित्र निर्माण भएको हो। नेपालबाट अनुप पौडेल, फ्रान्सबाट जस्टिन पेचबर्टी र डेमियन मेघेर्बी तथा जर्मनीबाट माइकल हेनरिक्स निर्माता रहेका छन्।

प्रचण्डमान श्रेष्ठ तथा ब्राजिलबाट तातियाना लेइते, लेओनार्दो मेक्की, पल जिश्लर, भेरोना मेइर स्टोर्म, मार्टिन रेचबक, सुसन्ने मान, कुमुदिनी गुरुङ श्रेष्ठ र सोहम ढकाल सह–निर्माताका रूपमा छन्।

चार्ल्स अडिनेट लाइन प्रोड्युसर रहेको चलचित्रमा अभिनेत्री केकी अधिकारी, प्रतीक सुवेदी र प्रतिभा जोशी एशोसिएट निर्माता छन्। अन्डरग्राउन्ड टकिज नेपालको तर्फबाट प्रवेश गुरुङ सह–निर्माता तथा आदित्य बस्नेत, अनुज पौड्याल, सन्तोष भट्टराई र बेन्जामिन ग्रुब्स एशोसिएट निर्माता रहेका छन्।

भदौ १९ गतेदेखि प्रदर्शनमा आउने ‘तिनीहरू : एलिफेन्ट्स इन द फग’ले मातृत्व, प्रेम, पहिचान र सामाजिक सीमाबीचको संघर्षलाई केन्द्रमा राखेको निर्माण पक्षको भनाइ छ।

सोमबार, भदौ ०८, २०८३ मा प्रकाशित