‘सुटिङ गर्ने अवस्थामा आफू नरहेको’ स्मरण गर्दै साहाराले त्यस समय रातभर निद्रा नलाग्ने र बिहान छायांकनका लागि फोन आउँदा झस्किने गरेको बताइन्। यद्यपि क्यामेराअघि आफ्नो व्यक्तिगत पीडा नदेखियोस् भन्ने प्रयास गर्दै उनले कामलाई निरन्तरता दिइन्।

साहाराका लागि ‘जलाकी’ अहिले एउटा चलचित्रभन्दा बढी बनेको छ। बुबाको सपना पूरा गर्ने माध्यमका रूपमा समेत उनले यसलाई लिएकी छन्। चलचित्रमा आफ्नो चरित्रसँग व्यक्तिगत रूपमा समेत जोडिन सकेको र कथाले आफूलाई सुरुदेखि नै आकर्षित गरेको उनको भनाइ छ।

डेब्यु चलचित्रमा निर्देशक अशोक थापा मगरबाट पाएको साथलाई पनि उनले विशेष रूपमा सम्झिएकी छन्। निर्देशक मगरले आफूलाई नयाँ कलाकार वा ‘आउटसाइडर’का रूपमा व्यवहार नगरी आफ्नै छोरीजस्तै मार्गदर्शन गरेको साहाराले बताइन्।

छायांकार शैलेन्द्र डी. कार्कीसहित सम्पूर्ण निर्माण टिमबाट राम्रो सहयोग पाएको उनको भनाइ छ। निर्माण टिम नै परिवारजस्तो भएकाले पहिलो चलचित्रमा काम गर्दा सहज भएको उनले बताइन्।

‘जलाकी’ आगामी मंसिर ४ गतेदेखि देशभर प्रदर्शनमा आउनेछ। ‘खुस्मा’ फेम्ड निर्देशक अशोक थापा मगरको निर्देशनमा बनेको चलचित्रमा साहारासहित सोनम तोप्देन, उपासना सिंह ठकुरी, शिल्पा मास्के, माओत्से गुरुङ, बुद्धि तामाङ, अस्तित्व भट्टचन, रजनी गुरुङ, राजु रेग्मी मगर, उषा खड्की, खड्कबहादुर पुन (खबपु), लुनिभा तुलाधर, संगीता थापा, कर्मा लामा तामाङ, भावना मगर, राज काउचा मगर र दुइसाङ थिनलगायतको अभिनय रहेको छ।

विशेष भूमिकामा क्याप्टेन विजय लामा तथा बालकलाकारमा मुन्जन थापा मगर, नुलाम्मा बान्तावा र रिन्सी धनाहा मगर रहेका छन्।

एम मिडिया प्रोडक्सनको ब्यानरमा निर्माण भएको चलचित्रका निर्माता ओम घर्ती मगर, वीरबहादुर लामा, चन्द्रबहादुर भट्टचन, बेताने मगर (बबिता राना), मानबहादुर धनाह मगर र सुस्मिता बुढाथोकी हुन्। शैलेन्द्र डी. कार्कीले छायांकन गरेको चलचित्रलाई काफिया फिल्मस् र कुवेर सिने डिष्ट्रिब्युसनले वितरण गर्नेछ।