काठमाडौं । अर्थमन्त्री डा. स्वर्णिम वाग्लेले भारतीय लगानीकर्ता, उद्योगी तथा व्यवसायीलाई नेपालमा लगानी र व्यापारका पर्याप्त अवसर रहेको भन्दै लगानी विस्तार गर्न आग्रह गरेका छन्।
भारत भ्रमणमा रहेका अर्थमन्त्री वाग्लेले नयाँदिल्लीस्थित इन्डिया ह्याबिट्याट सेन्टरमा कन्फेडेरेसन अफ इन्डियन इन्डस्ट्री (सीआईआई)ले आयोजना गरेको व्यापार तथा लगानी अन्तरक्रियामा नेपालका उदीयमान लगानीका क्षेत्रबारे जानकारी गराउँदै भारतीय व्यवसायीलाई नेपालको आर्थिक रूपान्तरणमा सहभागी हुन आह्वान गरेका हुन्।
वाग्लेले उच्च आर्थिक वृद्धिको सम्भावना भएका क्षेत्रमा नेपालले लगानीका अवसर उपलब्ध गराइरहेको उल्लेख गर्दै नेपालमा पहिलेदेखि सञ्चालनमा रहेका भारतीय कम्पनीलाई लगानी विस्तार गर्न र नयाँ लगानीकर्तालाई नेपाली बजार तथा सम्भावनाको खोजी गर्न आग्रह गरे।
उनले सरकारले सुशासन, आर्थिक समृद्धि, लगानी सहजीकरण र संरचनात्मक आर्थिक रूपान्तरणलाई प्राथमिकतामा राखेर काम गरिरहेको बताए। लगानीको वातावरणलाई थप अनुमानयोग्य, पारदर्शी र लगानीमैत्री बनाउन नीतिगत सुधारलाई तीव्रता दिइरहेको उनको भनाइ थियो।
वाग्लेले सूचना प्रविधि, स्वच्छ ऊर्जा, उच्च मूल्यका कृषि उत्पादन, पर्यटन तथा उत्पादन साझेदारीमा आधारित उद्योगलाई नेपालका महत्वपूर्ण सम्भावनायुक्त क्षेत्रका रूपमा प्रस्तुत गरे।
‘भारतीय व्यवसायीले नेपाललाई बजारका रूपमा मात्र नभई लगानी, उत्पादन, मूल्य अभिवृद्धि तथा क्षेत्रीय र विश्वव्यापी आपूर्ति शृङ्खलामा एकीकरणका लागि रणनीतिक साझेदारका रूपमा हेर्नुपर्छ,’ उनले भने।
अर्थमन्त्रीले वार्षिक बजेट, कर सुधार तथा लगानीकर्तामैत्री नीतिगत पहलमार्फत सरकारले व्यावसायिक वातावरण सुधार गर्ने, लगानीका अवरोध हटाउने र निजी क्षेत्रको नेतृत्वमा आर्थिक वृद्धिलाई सहजीकरण गर्ने प्रयास गरिरहेको बताए।
नेपाल र भारतबीचको दीर्घकालीन आर्थिक सम्बन्धले व्यापार तथा लगानी विस्तारका लागि आधार तयार गरेको उल्लेख गर्दै उनले दुई देशबीच आर्थिक सहकार्यलाई थप विस्तार गर्नुपर्नेमा जोड दिए।
सीआईआईको कार्यक्रममा भारतीय उद्योग तथा निजी क्षेत्रका प्रतिनिधिको सहभागिता रहेको थियो। अर्थमन्त्री वाग्लेको तीनदिने भारत भ्रमणमा नेपाल–भारत आर्थिक सहकार्य, लगानी, व्यापार तथा विपद्पछिको पुनर्निर्माणलगायत विषयमा छलफल भइरहेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.