पल शाह र जसिता गुरुङ पहिलोपटक जोडी बन्दै, दीपेन्द्र लामाले निर्देशन गर्ने

नमस्ते चितवन

सोमबार, असोज ०५, २०८३ मा प्रकाशित

काठमाडौं । निर्माता रोहित अधिकारीले आफ्नो ब्यानर रोहित अधिकारी फिल्म्समार्फत नयाँ फिल्म निर्माण गर्ने भएका छन्। फिल्ममा अभिनेता पल शाह र अभिनेत्री जसिता गुरुङको जोडी रहने तय भएको छ।

निर्माता अधिकारीले पल शाहलाई लिएर निर्माण गर्न लागेको फिल्मका लागि अभिनेत्री जसिता गुरुङसँग सोमबार सम्झौता गरेका हुन्। यसअघि नै पल शाहसँग मौखिक सहमति भइसकेको निर्माता अधिकारीले बताएका छन्। योसँगै पल शाह र जसिता गुरुङ पहिलोपटक पर्दामा जोडीका रूपमा देखिने भएका छन्।

फिल्म निर्देशनका लागि निर्देशक दीपेन्द्र लामासँग पनि सोमबार नै सम्झौता गरिएको रोहित अधिकारी फिल्म्सले जनाएको छ। फिल्मको शीर्षक भने अहिलेसम्म तय गरिएको छैन।

हाल फिल्मका अन्य कलाकार तथा प्राविधिक टोली छनोटको काम भइरहेको निर्माणपक्षले जनाएको छ। बाँकी कलाकारलाई पनि छिट्टै अनुबन्ध गरेर फिल्म छायांकनमा लैजाने तयारी छ।

फिल्मको निर्देशन दीपेन्द्र लामाले गर्नेछन् भने निर्माण रोहित अधिकारीले गर्नेछन्। अन्य कलाकार तथा प्राविधिक टोलीको टुंगो लागेपछि फिल्मको शीर्षक, छायांकनलगायत थप विवरण सार्वजनिक गरिने निर्माणपक्षले जनाएको छ।

यसैबीच, रोहित अधिकारी फिल्म्सले अभिनेता अनमोल केसीसँग ‘फर्की फर्की’पछि त्यसैको सिक्वेल निर्माण गर्ने घोषणा यसअघि नै गरिसकेको छ। उक्त फिल्मका लागि अनमोल केसीसँग सम्झौता समेत भइसकेको निर्माणपक्षले जनाएको छ।

यसरी रोहित अधिकारी फिल्म्सले एकैपटक फरक–फरक प्रोजेक्टलाई अगाडि बढाइरहेको छ। पल शाह र जसिता गुरुङको जोडी रहने नयाँ फिल्मको थप विवरण भने क्रमशः सार्वजनिक गरिनेछ।

सोमबार, असोज ०५, २०८३ मा प्रकाशित